«Ժառանգություն» խմբակցության պատգամավոր Զարուհի Փոստանջյանը դիմել է ՀՀ իշխանություններին, առջարկելով թույլ տալ իրեն սնունդ փոխանցել ոստիկանության ՊՊԾ գնդում գտնվող «սասնա ծռեր» խմբի անդամներին:
Դիմումն ուղղված է ՀՀ Վարչապետ Հովիկ Աբրահամյանին, ՀՀ արդարադատության նախարար Արփինե Հովհաննիսյանին, ՀՀ առողջապահության նախարար Արմեն Մուրադյանին, ՀՀ ոստիկանապետ Վլադիմիր Գասպարյանին, ՀՀ Ազգային անվտանգության ծառայության պետ Գեորգի Կուտոյանին եւ ՀՀ Մարդու իրավունքների պաշտպան Արման Թաթոյանին:
Դիմումում, մասնավորապես, ասվում է.
«Այսօր` 2016թ. հուլիսի 26-ին առավոտյան ժամը 9.00-ին, ես պետք է ՀՀ ոստիկանության Երևան քաղաքի ՊՊԾ գնդի ներսում գտնվող ապստամբած քաղաքացիների համար սնունդ փոխանցեմ: Ուստի խնդրում եմ ապահովել նման հնարավորություն»:
Զարուհի Փոստանջյանը նաեւ կոչով դիմել է Գարեգին Բ Ամենայն Հայոց Կաթողիկոսին ու Հայ եկեղեցու հոգեւոր բոլոր առաջնորդներին՝ նշելով.
«Այսօր` 2016թ. հուլիսի 26-ին, առավոտյան ժամը 9.00-ին ես պետք է սնունդ փոխանցեմ ՀՀ ոստիկանության Երեւան քաղաքի ՊՊԾ գնդի ներսում գտնվող ապստամբած հայրենակիցներին: Խնդրում եւ ակնկալում եմ սնունդի փոխանցման հարցում ձեր աջակցությունը: Մեր հայրենակիցների մասին հոգատարությունը նաեւ Հայ Առաքելական եկեղեցու սրբազան հայրերի եւ հոգեւոր սպասավորների պարտականությունն է»:
Այս պահին պատգամավորը գտնվում է Խորենացի փողոցում, սակայն ոստիկանները թույլ չեն տալիս մտնել ՊՊԾ գնդի տարածք: Փոստանջյանն այս մասին տեղեկացրել է ՄԻՊ-ի արագ արձագանքման խմբին:
Նշենք, որ «Հիմնադիր խորհրդարանի» անդամ Ալեք Ենիգոմշյանը նախօրեին հայտարարել էր, որ ներսում գտնվողները 2 օր է չունեն սնունդ, լեկտրականություն ու դեղորայք:
