Նյու Յորքում տեղակայված «Լրագրողների պաշտպանության կոմիտե» (CPJ) ՀԿ-ն դատապարտել է Թուրքիայում լրագրողների զանգվածային ձերբակալությունները ու հայտարարել, որ լրատվամիջոցների աշխատակիցներին ձերբակալել են ոչ թե հեղաշրջման փորձին մասնակցություն ունենալու, այլ իշխանություններին քննադատելու համար, փոխանցում է «ՌԻԱ Նովոստին»:
«Թուրքիայի իշխանությունները պետք է դադարեցնեն հեղաշրջման անհաջող փորձը օգտագործել որպես պատրվակ քննադատաբար տրամադրված լրագրողներին հետապնդելու համար»,- ասվում է կազմակերպության հայտարարության մեջ: «Լրագրողները չպետք է վճարեն կառավարությունը տապալելու՝ սպաների ապօրինի փորձի համար: Մենք Թուրքիայի իշխանություններին կոչ են անում լրագրողներին նրանց հայացքների համար բանտեր չգցել»,- ասել է հիմնադրամի ներկայացուցիչ Նինա Օգնիանովան:
Ավելի վաղ NTV հեռուստաալիքը հայտնել էր, որ Թուրքիայի դատախազությունը 42 լրագրողների ձերբակալելու որոշում է կայացրել: Նրանց խուզարկելու ու ձերբակալելու գործողությունը իրականացվում է ընդդիմադիր իսլամական քարոզիչ Ֆեթուլահ Գյուլենի հետ կապեր ունենալու կասկածով: Անկարան Գյուլենին է մեղադրում հեղաշրջման փորձ կազմակերպելու մեջ:
Հուլիսի 16-ի գիշերը ապստամբները փորձել են Թուրքիայում ռազմական հեղաշրջում իրականացնել, որը իշխանությունները կանխել են: Ըստ վերջին տվյալների՝ դիմակայության հետեւանքով, որը ծավալվել էր Ստամբուլում ու Ակարայում, զոհվել է Թուրքիայի 246 քաղաքացի, չհաշված խռովարարներին, ավելի քան 2 հազար մարդ էլ վիրավորվել է: