Հայաստանը խնդիրների չի բախվում Եվրամիության հետ համագործակցության մասին նոր փաստաթղթի հարցով բանակցություններում։ Այս մասին հուլիսի 26-ին լրագրողներին ասել է ՀՀ էկոնոմիկայի փոխնախարար Գարեգին Մելքոնյանը։
Նրա խոսքով՝ բանակցություններն, ընդհանուր առմամբ, ընթանում են ըստ գրաֆիկի։ Ամսական մի քանի անգամ փոխադարձ այցելություններ եւ տեսախորհրդակցություններ են ընթանում։ Մինչեւ տարեվերջ պետք է կայանա բանակցային 2 խոշոր փուլ։ Բանակցությունների ավարտի հստակ ժամկետներ նշելն անհնար է, որպեսզի ավելորդ խիստ սահմաններից չտուժի բովանդակությունը։ Փոխնախարարի խոսքով՝ հարցեր չեն առաջանում նաեւ ապագա փաստաթղթի այնպիսի զգայուն կետի շուրջ, ինչպիսին առեւտուրն ու ներդրումներն են (այս կետը մյուսներից շատ ԵՏՄ անդամակցության հետ համաձայնեցնելու կարիք ունի)։ Տեքստից որոշ դրվագներ արդեն համաձայնեցվել են, մյուսները դեռ քննարկվում են։
«Քանի որ Հայաստանը նախկինում արդեն անցել է ԵՄ–ի հետ փաստաթղթի նախապատրաստման ճանապարհով, նոր փաստաթուղթն ավելի արագ է կազմվում։ Մյուս կողմից՝ դժվարությունն այն է, որ դրա դրույթները պետք է համաձայնեցվեն ԵՏՄ անդամակցության մասին համաձայնագրին»,– հավելեց Գարեգին Մելքոնյանը։