Ոստիկանության ՊՊԾ գունդը գրաված «Սասնա ծռերի» անդամները ապահովված են սննդով: Այս մասին այսօր՝ հուլիսի 26-ին, Երեւանի Խորենացի փողոցում հավաքված ցուցարարներին ասել է ոստիկանության ներկայացուցիչ, որը չցանկացավ ներկայանալ: Խորենացի փողոցում գտնվող ԱԺ պատգամավոր Զարուհի Փոստանջյանին մոտենալով՝ փոխգնդապետը տեղեկացրեց, որ ՊՊԾ գնդի ներսում գտնվող «Սասնա ծռեր» զինված խմբի անդամների սննդի հարցը լուծվել է, նրանց փոխանցվել է սնունդ, սակայն, պատգամավորը տարակուսանքով մոտեցավ նրա ասածներին՝ նշելով, որ չի հավատում:
Նշենք, որ ոստիկանության լրատվության ծառայությունից եւս նշել են, որ «Սասնա ծռերի» անդամներին փոխանցվել է սնունդ:
Ավելի վաղ տեղեկացրել էինք, որ «Ժառանգություն» խմբակցության պատգամավոր Զարուհի Փոստանջյանը դիմել է ՀՀ իշխանություններին, առաջարկելով թույլ տալ իրեն սնունդ փոխանցել ոստիկանության ՊՊԾ գնդում գտնվող «Սասնա ծռեր» խմբի անդամներին, սակայն, այսօր ոստիկանությունը ցուցարարներին թույլ չտվեց սնունդ փոխանցել «Սասնա ծռերին»:
Բացի այդ, «Հիմնադիր Խորհրդարանը» հայտարարություն է տարածել, նշելով. «Այսօր առավոտյան ժամը 7-ի սահմաններում արիասիրտ մի հայորդի` Արթուր Սարգսյանը, իր անձնական օգտագործման մեքենան ամբողջությամբ բեռնել է սննդով եւ ճեղքելով ոստիկանական արգելապատնեշը, հասել ազատագրված տարածքի մուտքի մոտ, ոստիկանները բոլոր կողմերից կրակ են բացել Արթուրի մեքենայի վրա: Բարեբախտաբար Արթուրը ոչ մի վնասվածք չի ստացել եւ բարեհաջող կերպով սնունդը տեղ է հասցրել»: