«Սասնա ծռեր» խմբի անդամ Թաթուլ Թամրազյանը, որը ծանր հրազենային վիրավորում էր ստացել հուլիսի 17-ին ոստիկանության ՊՊԾ գունդը գրոհելու ժամանակ, դեռեւս կայուն ծանր է։ Այս մասին այսօր՝ հուլիսի 26-ին, լրագրողների հետ զրույցում ասաց «Էրեբունի» բժշկական կենտրոնի վերականգնողական եւ թերապիայի բաժանմունքի վարիչ Հարություն Մանգոյանը։
«Թամրազյանը վերակենդանացման բաժանմունքում է, ընթացիկ հետազոտությունների փուլում է, կայուն ծանր վիճակում»,-ասել է Հարություն Մանգոյանը։
Լրագրողների հարցին, թե նրա կյանքին վտանգ սպառնո՞ւմ է, բժիշկը պատասխանել է․
«Եթե ծանր է, ուրեմն ինչ որ չափով կյանքին վտանգ կա, ոնց որ ցանկացած մարդու, որը վերակենդանացման բաժանմունքում է։ Թամրազյանի գիտակցությունը տեղն է»։
Հարություն Մանգոյանը նշել է, որ տեղյակ չէ՝ հարազատները տեսակցել են նրան, թե ոչ։
