ԵՄ ծրագրերը Հայաստանում կկրեն շարունակական բնույթ, եւ առաջիկա ծրագրերն առավելապես ուղղված կլինեն փոքր տնտեսությունների խթանմանն ու պարենային անվտանգության ապահովմանը: Այս մասին, հուլիսի 25-ին, ՀՀ գյուղատնտեսության նախարար Սերգո Կարապետյանի հետ հանդիպման ժամանակ նշել է Հայաստանում ԵՄ պատվիրակության արտաքին համագործակցության պատասխանատու Ջոն Բարքերը:
Գյուղնախից NEWS.am-ին հայտնում են, որ հանդիպման սկզբին կողմերը քննարկել են Եվրամիության աջակցությամբ Հայաստանում իրականացվող ծրագրերը: Ընդգծելով, որ այդ ծրագրերը մեծապես նպաստել են Հայաստանում գյուղատնտեսության բնագավառի զարգացմանը` նախարար Կարապետյանը հույս է հայտնել, որ այսուհետ եւս ԵՄ-ն կշարունակի աջակցություն ցուցաբերել մեր երկրում ագրարային ոլորտի զարգացմանը:
Այս համատեքստում նախարարը հատկապես կարեւորել է նորաստեղծ կոոպերատիվներին աջակցելու անհրաժեշտությունը:
«Կոոպերացիան մեր երկրի գյուղատնտեսության զարգացման հիմնական գրավականն է, ուստի հարկավոր է միջոցներ ձեռնարկել այս շարժման խթանման եւ նոր կոոպերատիվների ձեւավորման ուղղությամբ», - նշել է նախարարը:
Բարձր գնահատելով հատկապես վերջին տարիներին Հայաստանի եւ Եվրամիության միջեւ ձեւավորված սերտ հարաբերությունները` Բարքերը վերահաստատել է, որ ԵՄ ծրագրերը Հայաստանում կկրեն շարունակական բնույթ, եւ առաջիկա ծրագրերն առավելապես ուղղված կլինեն փոքր տնտեսությունների խթանմանն ու պարենային անվտանգության ապահովմանը: Նա նաեւ հույս է հայտնել, որ ԵՄ ծրագրերի շնորհիվ նպաստավոր պայմաններ կստեղծվեն երկրում կոոպերացիայի խթանման համար:
Հանդիպման ընթացքում անդրադարձ է կատարվել նաեւ Երեւանում անցկացվող ամենամյա «Գյուղական կյանքի եւ ավանդույթների» փառատոնի ընթացիկ աշխատանքներին: Փառատոնը կազմակերպվում է ՀՀ գյուղատնտեսության նախարարության եւ Երեւանի քաղաքապետարանի աջակցությամբ «Կանաչ արահետ» հասարակական կազմակերպության կողմից:
Ջոն Բարքերը հավելել է, որ այս տարի փառատոնին իրենց արտադրանքը կներկայացնեն նաեւ ԵՄ կողմից իրականացվող ծրագրերի շրջանակում ստեղծված կոոպերատիվները:
Հանդիպման ընթացքում քննարկվել են երկկողմ հետաքրքրություն ներկայացնող այլ հարցեր եւս: