Ֆրանսիայում դրամահավաք են կազմակերպել Նիսի ահաբեկչին կանգնեցնելու փորձ կատարած տղամարդու համար նոր սքութեր գնելու համար, հայտնում է France Info–ն։
«Սքութեր հերոսի համար» ակցիան կազմակերպել են Մանշ դեպարտամենտի 2 բնակիչ։ Նրանք պարզաբանել են, որ առաջին հերթին ուզում են շնորհակալություն հայտնել հերոսին, երկրորդ հերթին՝ վերականգնել արդարությունը, քանի որ հասկանում են, որ ապահովագրությունը չի փոխհատուցի կորցրած տրանսպորտային միջոցը։ Ֆրանկ անունով տղամարդը փաստացի սքութերն ինքն էր ուղղել բեռնատարի անիվների տակ, իսկ դա ապահովագրական դեպք չէ։
Ի սկզբանե պլանավորվում էր 9 հազար եվրո հավաքել, բայց գումարի չափն արդեն հասել է 21 հազարի եւ շարունակում է աճել։ Leetchi.com կայքը, որում տեղադրված է խնդրագիրը, հայտնում է, որ գումարը շարունակում է աճել։ Ավելորդ գումարը պլանավորվում է հատկացնել Նիսի բժշկական հաստատություններին։
Ֆրանկն աշխատում է Նիսի մաքսային ծառայությունում։ Հուլիսի 14-ի ահաբեկչության ժամանակ նա, տեսնելով բեռնատարը, ցատկել էր սքութերի վրա եւ փորձել էր կանգնեցնել վարորդին՝ նետվելով բեռնատարի անիվների տակ։ Ահաբեկիչը փորձել էր կրակել Ֆրանկի վրա, սակայն զենքը չէր ենթարկվել։ Հերոսության համար Ֆրանկին Նիսի իշխանությունների անունից մեդալ էին հանձնել։