Հուլիսի 26-ին Բեռլինի Շտեգլից թաղամասում Բենջամին Ֆրանկլինի անվան կլինիկայում անհայտ անձը կրակել է բժշկի վրա, որը հիմա ծայրահեղ ծանր վիճակում է, իսկ կրակողը ինքնասպան է եղել, «ՌԻԱ Նովոստիին» այս մասին հայտնել է ոստիկանության մամուլի ծառայության ներկայացուցիչը:
«Բժիշկը ծանր վիրավորվել է, իմ տեղեկություններով նա ծայրահեղ վիճակում է, հնարավոր է նրան վիրահատեն, ավելի մանրամասն ասել չեմ կարող: Նրա վրա կրակող մարդը ինքնասպան է եղել»,- ասել է գործակալության զրուցակիցը: Նրա խոսքով բժիշկի վրա կրակել է կլինիկայի հիվանդներից մեկը:
DPA գործակալության տեղեկություններով հրաձգությունը կատարվել է դիմածնոտային վիրահատության բաժանմունքում, կլինիկայի աշխատակիցներին բարձր կապով խնդրել են մնալ աշխատասենյակներում ու փակել դռները: Կլինիկայի մուտքի մոտ առնվազն 20 ոստիկանական, փրկարարական ու հրշեջ ծառայության մեքենա է կանգնած, կլինիկայի մուտքը փակ է:
Բեռլինի հարավ արեւմուտքում գտնվող Բենջամին Ֆրանկլինի անվան կլինիկան Եվրոպայի համալսարանական խոշորագույն Շերիտե չորս կլինիկաներից մեկն է: Շենքը կառուցվել է քսաներորդ դարի վաթսունականներին ու նախատեսված է 900 հիվանդների համար:
