Որոշ վրիպումներ ակնհայտ են իշխանությունների եւ «Սասնա ծռեր» խմբի տղաների միջեւ ընթացող բանակցություններում: Այս մասին այսօր՝ հուլիսի 26-ին, «Զինված խմբի հետ բանակցությունները. ներկա իրավիճակը եւ հնարավոր ելքեր» թեմայով քննարկման ժամանակ նշել է բանակցային գործի մասնագետ, CM&Partners ընկերությունում ավագ խորհրդատու Արթուր Մարտիրոսյանը:
Նրա խոսքով, նախ բանակցողին սովորեցնում են լսել ու հասկանալ մյուս կողմին, եթե, իհարկե, բանակցողը փնտրում է բանակցային լուծում: «Քայլ մեկ՝ եթե տարածքը ամբողջովին վերահսկողության տակ է, ոստիկանությունը վերահսկում է նաեւ հաղորակցությունը, պետք է ոչ մի աղմուկ չլինի, պետք է բանակցի միայն թիմը: Նաեւ բանակցողը չպետք է լինի մեկ մարդ, թիմով պետք է գործել: Կարեւոր է, որ կողմերը միմյանց նկատմամբ վստահություն ունենան: Ուժեղ կողմը պետք է այնպես անի, որ վստահություն լինի, որպեսզի իր ասածին հավատան: Եթե դա չկա, մենք չենք ունենա բանակցություն»,-ասաց նա:
Մարտիրոսյանի խոսքով, այս դեպքում՝ հստակ չէր, թե գեներալ Վիտալի Բալասանյանը միջնորդ է , թե բանակցող, նա բանակցում էր իշխանության կողմի՞ց, թե՞ միջնորդ էր:
Նա կարծիք հայտնեց, որ պետք չէ բացասական վերաբերվել նրան, որ դիպուկահարներ կան այդ տարածքում. «Եթե նրանք կան, չի նշանակում, որ անպայման պետք է կրակեն: Դիմացի կողմը պետք է հասկանա, որ այստեղ էլ ուժ կա: Մեզ մոտ այնպիսի վիճակ է ստեղծվել, որ զինված խումբը հույս ունի, որ ժողովուրդը պետք է դուրս գա փողոց: Դրա համար հաղորդակցությունը կարեւոր լծակ է: Եթե նրանք զգում են, որ ունեն ժողովրդի օժանդակությունը, հասկանում են, որ ուժային մեթոդ չի կիրառվելու, էլ ի՞նչը կարող է ստիպել նրանց բանակցել: Հետեւաբար, ուժային կողմը պետք է լինի, բայց այն օգտագործվի խիստ սահմանափակ դեպքերում»:
Մարտիրոսյանն անդրադարձավ նաեւ լրագրողների աշխատանքին՝ նշելով, որ չպետք է տեղեկատվությունը տան միակողմանի եւ առանց հիմքերի: «Իրականում տեղեկատվությունը պետք է տրվի միայն բանակցող թիմի կողմից, այն պետք է տրվի միշտ, ռեգուլյար. «Ես չեմ տեսնում, որ իշխանությունն ունի հաղորդակցության մարտավարություն»: