ԱՄՆ Հանրապետական կուսակցությունից երկրի նախագահի թեկնածու առաջադրված Դոնալդ Թրամփն ասել է, որ ընտրվելու դեպքում կքննարկի Ռուսաստանի հետ միություն կազմելու հնարավորությունը՝ «Իսլամական պետության» դեմ պայքարելու նպատակով, սակայն հերքել է ցանկացած ենթադրություն այն մասին, որ Ռուսաստանի նախագահ Վլադիմիր Պուտինն օգնում է իրեն նախընտրական պայքարում: Այս մասին գրում է Reuters-ը:
Հյուսիսային Քարոլինայում իր կողմնակիցների առջեւ ելույթում Թրամփը հերքել է նաեւ Դեմոկրատական կուսակցության Ազգային հանձնաժողովի անդամների էլեկտրոնային նամակագրությունը կոտրելու գործին ռուսական հատուկ ծառայությունների հնարավոր մասնակցության մասին ենթադրությունները:
Թրամփը հերքել է մեղադրանքները, որ ռուսաստանցի հաքերները կարող էին գողանալ նամակները, որպեսզի իրեն օգնեն հաղթանակ տանել նոյեմբերի 8-ին նախանշված ընտրություններում: Միլիարդատերը դա կոչել է «դավադրության ամենատարօրինակ տեսություններից մեկը», որի մասին երբեւէ լսել է:
Նրա խոսքով՝ երբեք չի հանդիպել Պուտինի հետ: Սակայն նախընտրական արշավի ժամանակ նա բազմիցս գովաբանել է Ռուսաստանի առաջնորդին, իսկ արտաքին քաղաքականության հարցերով նրա առաջատար խորհրդական, պաշտոնաթող գեներալ Մայքլ Ֆլինը 2015 թվականի դեկտեմբերին ընթրել է Պուտինի հետ: «Եթե մտածենք, մի՞թե վատ կլիներ հաշտվել Ռուսաստանի հետ: Վատ չէր լինի միավորվել եւ ինչպես հարկն է՝ դաս տալ ԻՊ-ին»,- հայտարարել է Թրամփը: