Ֆրանսիայի Սենտ Էտիեն դյու Ռուվրե քաղաքում եկեղեցու վրա երկու հարձակվողներից մեկը կարող էր հայտնի լինել հակաահաբեկչական ծառայություններին: Այս մասին AFP-ին հաղորդել է հետաքննությանը մոտ կանգնած աղբյուրը:
Աղբյուրի համաձայն՝ հարձակվողներից մեկը ներառված էր, այսպես կոչված, «S ցանկում». տվյալների բազա այն անձանց մասին, որոնք կարող են վտանգ ներկայացնել պետական անվտանգության համար:
RFI-ի հաղորդմամբ՝ 2015 թվականին նա փորձել է Սիրիա մեկնել, սակայն Թուրքիայում ձերբակալվել եւ հետ է ուղարկվել: Ֆրանսիայում նրան մեղադրանք է առաջադրվել «ահաբեկչական կազմակերպության հետ կապ ունեցող հանցավոր խմբավորմանն անդամակցության համար»: Նրան ազատ են արձակել՝ պարտավորեցնելով էլեկտրոնային ապարանջան կրել:
Tribune de Gèneve պարբերականն է հաղորդում է, որ կասկածյալներից մեկը՝ 19-ամյա ֆրանսիացի, անցյալ տարվա մայիսին Թուրքիայից արտաքսվելուց հետո ձերբակալվել է Ժնեւում: Մի քանի օր նա անցկացրել է տեղական բանտում, իսկ հետո Ֆրանսիա ուղարկվել: Պարբերականի տեղեկություններով, նա փորձել է երկու անգամ Սիրիա մեկնել, նախ՝ Մյունխենով, ապա՝ Ժնեւով:
Հուլիսի 26-ի առավոտյան Սենտ Էտիեն դյու Ռուվրե քաղաքում երկու տղամարդ եկեղեցում մարդկանց էին պատանդառել: 84-ամյա հոգեւորական Ժակ Ամելը սպանվել է, այդ պահին եկեղեցում գտնվող 5 անձ վիրավորվել է:
Հարձակման պատասխանատվությունը ստանձնել է «Իսլամական պետություն»-ը: