N զորամասի 3 ժամկետային զինծառայողները մեղադրվում են պահետսին գողություն կատարելու մեջ: Այս մասին NEWS.am-ը տեղեկացավ Դատական տեղեկատվական համակարգից:
Ըստ մեղադրական եզրակացության՝ ժամկետային զինծառայողներ Հովհաննես Շ.-ն, Տիգրան Ա.-ն, Միխայել Ի.-ն մուտք են գործել զորամասի իրային ծառայության պահեստ, այնտեղից հափշտակել 214 հազար դրամի համարժեք ձմեռային եւ ամառային համազգեստներ: Գողոնը տեղափոխել են պահեստներից դուրս գտնվող կիսաքանդ շինություն, սակայն հանցագործությունը ավարտին չեն հասցրել կամքից անկախ հանգամանքներով: Հանցագործության մասին իմացել են իրային ծառայության ու իրային գույքի պահեստի պետեր Ռաֆիկ Ա.-ն ու Սմբատ Վ.-ն, սակայն չեն զեկուցել վերադաս հրամանատարությանը:
Ժամկետային զինծառայողներին մեղադրանք է առաջադրվել Քրեական օրենսգրքի 34-177-րդ հոդվածի 2-րդ մասի 1-ին եւ 3-րդ կետերով, Ռաֆիկ Ա.-ին՝ 375-րդ հոդվածի 1-ին մասով, իսկ Սմբատ Վ.-ին՝ 38-375-րդ հոդվածի 1-ին մասով: Խափանման միջոց է ընտրվել ստորագրություն չհեռանալու մասին:
Գործը քննվում է Սյունիքի մարզի ընդհանուր իրավասության դատարանում: