2016թ. ընթացքում Սեւանա լճում խեղդվել է երկու քաղաքացի, բայց ոչ լողափնյա սեզոնին: Այս մասին այսօր` հուլիսի 27-ին, լրագրողների հետ հանդիպմանն ասաց ՀՀ ԱԻՆ Փրկարար ծառայության Գեղարքունիքի մարզային փրկարարական վարչության Հատուկ ջրափրկարարական ջոկատի հրամանատար, փրկարար ծառայության կապիտան Արմեն Ճզմաչյանը. «Սեւանա լճում լողափնյա սեզոնի ընթացքում մահվան ելքով պատահարներ չեն եղել: Ջրահեղձման երկու դեպք է եղել, երկու ձկնորս է մահացել` մարտ ամսին խորտակվել էր նրանց նավակը: Հունիսի մեկից ուժեղացված ռեժիմով ծառայության ենք անցել, Սեւանի ավազանում տեղակայված երեք լողափերում իրականացվում է ուժեղացված ծառայություն առավոտյան ժամը 09:00-21:00-ը»:
Արմեն Ճզմաչյանը քաղաքացիներին խորհուրդ տվեց պահպանել անվտանգության կանոնները եւ լողալիս չանցնել լողանշումները, ալկոհոլ, շատ սնունդ օգտագործած վիճակում չմտնել լողալու, ջուրը չցատկել նավերի կամ բարձր տարածքների վրայից, ջրամբարներում լողալուց խուսափել, հետեւել փրկարարների ցուցումներին:
