Ռուանի արվարձանում կատարված հարձակումից հետո Ֆրանսիայի կրոնական ներկայացուցիչները պահանջել են ուժեղացնել անվտանգության միջոցառումները եկեղեցիներում, հայտնում է «ՌԻԱ Նովոստին»:
Ֆրանսիայի նախագահ Ֆրանսուա Օլանդի հետ հանդիպելուց հետո Փարիզի մզկիթի իմամ Դալիլ Բուբաքերը հայտարարել է, որ Ֆրանսիայի տարբեր կրոնների ներկայացուցիչները ուզում են, որ պաշտամունքային վայրերը դառնան «ավելի մեծ ուշադրության օբյեկտներ»:
«Ֆրանս փրես» գործակալության տվյալներով նա նաեւ հայտնել է Ֆրանսիայում իսլամի ինստիտուտների բարեփոխումը նախաձեռնելու՝ մուսուլմանների մտադրության մասին:
Հուլիսի 26-ին առավոտյան մոտ 9:45-ին երկու անհայտ անձ, զինված դանակներով, Սենտ-էտյեն- դյու-Ռուվրեի եկեղեցում հինգ մարդու են պատանդառել առավոտյան պատարագի ժամանակ՝ հոգեւորականին, եկեղեցու երկու ծառայողների ու երկու հավատացյալների: Ոստիկանությունը կրակ է բացել ու սպանել շենքից դուրս եկած հանցագործներին: Շենքում գտել են սպանված 86-ամյա հոգեւորական Ժակ Ամելի մարմինը, որի կոկորդն էին կտրել: Եվս մեկ տուժածի գտել են ծանր վիճակում:
Դեպքի վայր ժամանած Ֆրանսիայի նախագահը կատարվածն անվանել է ահաբեկչական հանձակում՝ նրա խոսքով հարձակվողները իրենց ԻՊ գաղափարակիր են համարում: Ավելի ուշ ԻՊ-ն պատասխանատվություն է ստանձնել հարձակման համար: