Հայաստանում բուժաշխատողներին պատանդ վերցնելը աննախադեպ երեւույթ է։ Այս մասին հուլիսի 27-ին՝ մամուլի ասուլիսի ժամանակ, ասաց առողջապահության փոխնախարար Վահան Պողոսյանը՝ անդրադառնալով ՊՊԾ գունդը գրաված զինված խմբի կողմից 4 բժիշկների պատանդ վերցնելուն։
Նրա խոսքով՝ այդ բժիշկներն արդեն 10 օր բուժօգնություն են ցուցաբերում այդ մարդկանց։ «Անհրաժեշտ է պարզապես մարդասիրական մոտեցնում ցուցաբերել եւ թույլ տալ, որպեսզի բժիշկները կատարեն իրենց աշխատանքը։ Այդ մարդկանցից ոմանք Ղարաբաղում կռվել են, բազմաթիվ վիրավորումներ են ստացել, եւ այդ նույն բժիշկներն օգնել են նրանց։ Չի կարելի բժիշկներին արգելել կատարել իրենց աշխատանքային պարտականությունները կամ այնպես անել, որ նրանք դա կատարեն նման լարված իրավիճակում։ Այսօր առողջապահության համակարգը վրդովված է այդ երեւույթից, քանի որ նրանք մեր գործընկերներն են»,– ընդգծել է Վահան Պողոսյանը։
Հիշեցնենք, որ Առողջապահության նախարարության մամուլի ծառայության փոխանցմամբ՝ իրենց մասնագիտական պարտականությունները կատարելիս «Սասնա ծռեր» խմբի կողմից պատանդ են վերցվել բժիշկներ Նորայր Թեւանյանն ու Սալվադոր Չեխոյանը, բուժեղբայր Դավիթ Տոնոյանը եւ բուժքույր Մալինա Մարգարյանը։
