Երեւանում բժիշկներին պատանդ վերցնելու արարքը ամբողջովին ենթակա է դատապարտման. բժիշկները որքան հնարավոր է արագ պետք է ազատության մեջ հայտնվեն։ Այս մասին հուլիսի 27-ին Երեւանի պետական բժշկական համալսարանում ասել է «Իզմիրլյան» ԲԿ–ի տնօրեն Արմեն Չարչյանը։

Նա ցնցված է կատարվածից։ «Կարծում եմ, որ բոլոր մասնագիտություններից ամենամարդասիրականը բժշկությունն է։ Եվ պատահական չէ, որ բժշկության խորհրդանիշը այրվող մոմն է։ Բժիշկները այրվելով սպառում են իրենց ուժերը, եւ դա բոլոր բժիշկների կարգախոսն է ու կրեդոն՝ առողջություն տալ սեփական առողջության եւ կյանքի հաշվին։

Ամբողջ աշխարհում բոլոր ժամանակներում բժշկի նկատմամբ ոտնձգությունը ստոր արարք է համարվել։ Ցավոք, ես դա տեսնում եմ սեփական ժողովրդի մեջ»,– ասել է Չարչյանը։

Նրա խոսքով՝ Ղարաբաղյան պատերազմի ժամանակ բժիշկները սեփական առաքելությունն ունեին. բժիշկը երբեք չի եղել քաղաքականության մեջ, նա միշտ ցանկացած քաղաքականությունից վեր է եղել։ «Եվ եթե այսօր մենք բժշկի նկատմամբ կոպիտ գործողություններ ենք տեսնում, դա վրդովում է մեզ եւ խորը հոգեւոր ցավ է պատճառել։ Բժշկական հասարակության ճնշող մեծամասնության անունից կոչ եմ անում բոլորին անել հնարավոր ամեն բան մեր բժիշկներին ազատելու համար»,– ասել է Արմեն Չարչյանը։