Մարդու իրավունքների պաշտպանի ներկայացուցիչներն այցելել են Ոստիկանության Շենգավիթի բաժին եւ տեսակցել Գյումրիի «Ասպարեզ» լրագրողների ակումբի նախագահ Լեւոն Բարսեղյանին:

ՄԻՊ-ի գրասենյակից NEWS.am-ին հայտնում են, որ ՄԻ պաշտպանի ներկայացուցիչներն առանձնազրույց են ունեցել Լեւոն Բարսեղյանի հետ, ապա օժանդակել, որպեսզի կայանա նրա ու փաստաբանի հանդիպումը:

Նշենք, որ ըստ ոստիկանության նախօրեին տեղի ունեցած երթից հետո ապօրինի զենք, զինամթերք եւ պայթուցիկ նյութեր պահելու կասկածանքով բերման է ենթարկվել 64 քաղաքացի: Նրանցից 63-ն ազատ են արձակվել, մեկը ձերբակալված է, քանի որ նրա մոտ թմբուկավոր զենք է հայտնաբերվել: Ձերբակալվածը «Հիմնադիր խորհրդարանի» անդամ Արմեն Միքայելյանն է:

Պարզվում է, որ Լեւոն Բարսեղյանն ազատ չի արձակվել: Նրա որդին՝ Հայկ Բարսեղյանը, նշել է, որ հայրը Շենգավիթի ոստիկանությունում է:

Նշենք, որ Լևոն Բարսեղյանը բերման է ենթարկվել ժամը 3։00-ի շրջանում եւ ըստ օրենքի պետք է ազատ արձակվեր դրանից երեք ժամ հետո։