Ոստիկանության ՊՊԾ գնդի տարածքում գտնվող բժիշկները պետք է ազատվեն։ Նրանք չպետք է ինչ–ինչ հավակնությունների գերի դառնան։ Այս մասին հուլիսի 27-ին Երեւանի պետական բժշկական համալսարանում ասել է Հայաստանի գլխավոր համաճարակաբան Վլադիմիր Դավիդյանցը։
Նրա խոսքով՝ այդ արարքը ոչ մի արդարացում չունի։ «Ես վրդովված եմ, ես չեմ հիշում մի դեպք, որ բժիշկը, բուժաշխատողը, որը գնացել է օգնություն ցուցաբերելու, անկախ այն հանգամանքից, թե ով է տուժածը, հանկարծ պատանդ է վերցվում։ Միթե մենք հասել ենք դրան։ Միթե մենք հասել ենք այն վիճակին, որ մարդը, որն ուզում է քեզ օգնել, պատանդ վերցվի։
Ես իրոք չեմ կարող բառեր գտնել, քանի որ այդպես անել չի կարելի։ Այդ պատճատով ես՝ որպես ՀՀ քաղաքացի, որպես բուժաշխատող, որը 40 տարի այս համակարգում է, պահանջում եմ, որ նրանց անհապաղ ազատ արձակեն»,– ընդգծել է Դավիդյանցը եւ հավելել, որ բուժաշխատողը պետք է անի իր գործը։
«Այդ պատճառով նա պետք է անհապաղ ազատ արձակվի, որպեսզի անցնի իր մասնագիտական պարտականությունների կատարմանը»,– եզրափակել է Դավիդյանցը։