«Սասնա ծռեր» խմբի անդամներ Պավել Մանուկյանին ու իր որդուն՝ Արամ Մանուկյանին, մեղադրանք է առաջադրվել Քրեական օրենսգրքի 219-րդ հոդվածի 3-րդ մասով (Շենքեր, շինություններ, տրանսպորտի, հաղորդակցության կամ կապի միջոցներ զավթելը) եւ 235-րդ հոդվածով (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։ Այս մասին այսօր՝ հուլիսի 27-ին, լրագրողների հետ զրույցում հայտնել է նրանց պաշտպան Ինեսսա Պետրոսյանը, որը քիչ առաջ հիվանդանոցում հանդիպել է իր պաշտպանյալներին։
«Պավել Մանուկյանն ու Արամ Մանուկյանը ներկայացվել են որպես մեղադրյալներ, քիչ անց դատարանում միջնորդության քննություն պիտի սկսվի։ Քննիչները ներկայացրել են միջնորդություններ, որ պատրաստվում են դիմել դատարան՝ խափանման միջոցը կալանք ընտրելու վերաբերյալ»,-ասել է փաստաբանը։
Նրա խոսքով՝ Պավլիկ Մանուկյանը, չնայած իր առողջական ծանր վիճակին, ցանկություն է հայտնել լինել դատարանում, իսկ Արամը՝ ոչ։
Ինչ վերաբերում է դատապարտյալների հիվանդանոց տեղափոխվելուն, նա ասել է. «Դատապարտյալների հիվանդանոց» անձին տեղափոխում են, եթե լինում է խափանման միջոց կալանքի որոշումը եւ այն դեպքում, եթե ներում է նրանց առողջական վիճակը, որ տեղափոխեն ու շարունակական բուժումը կարողանան շարունակել։ Տեղափոխելու համար պետք է պատրաստ լինեն վիրահատությունների, իսկ քրեակատարողական հիվանդանոցում չկա այն հագեցվածությունը, ինչպես մյուս բժշկական կենտրոններում»։
Ավելի վաղ NEWS.am-ը հայտնել էր, որ ուշ ոստիկանության լրատվության վարչության պետ Աշոտ Ահարոնյանն facebook-ի իր էջում գրել է, որ փոխհրաձգություն է տեղի ունեցել ոստիկանների ու «Սասնա ծռերի» անդամների միջեւ, որի հետեւանքով վիրավորվել են մեկ ոստիկան, Պավել Մանուկյանն ու նրա որդին, իսկ «Սասնա ծռերից» Գագիկ Եղիազարյանն ու Արամ Հակոբյանը հանձնվել են ոստիկանությանը: Վիրավորները տեղափոխվել են հիվանդանոց:
Իր հերթին «Սասնա ծռեր» խմբի անդամ Արեգ Կյուրեղյանի հայրը՝ Արմենակ Կյուրեղյանը հայտարարել է, որ երեկ ուշ երեկոյան Պավլիկ Մանուկյանը փորձել է բանակցել ոստիկանների հետ, որ իրենց տրամադրեն բժիշկ կամ վիրավորին տանեն բուժելու: Այդ պահին ծանր գնդացրային զինատեսակից կրակ է բացվել Պավլիկ Մանուկյանի վրա: Որդին տեսնելով դա վազել է օգնության եւ նրա վրա եւս կրակ է բացվել: Հետո «Սասնա ծռերի» անդամներից մեկն էլ է վազել օգնության, նրան էլ են վիրավորել: Ծանր վիրավորված Պավլիկին եւ նրա որդուն փորձել են պատգարակներով օգնություն ցուցաբերել, ու նրանց այդտեղ «զախվատ» են արել»: