Երեւանի «Սլավմեդ» բժշկական կենտրոնում հուլիսի 26-ին կեսարյան հատումով ծննդաբերած 28-ամյա կինը «Արմենիա» ԲԿ է տեղափոխվել ծայրահեղ ծանր վիճակում: Այս մասին NEWS.am-ի թղթակցին ասաց ԲԿ-ի վերակենդանացման բաժանմունքի վարիչ Սուրեն Մակարյանը:
«Ծննդկանը միացված էր արհեստական շնչառության ապարատին, անգիտակից էր, ծայրահեղ ծանր վիճակում: Մեզ մոտ տեղափոխվել է առավոտյան ժամը 09:00-ին եւ 14:30-ին մահացել է»,- ասաց Սուրեն Մակարյանը:
Ըստ բաժնի վարիչի՝ ծննդկանն ունեցել է արյան կորուստ: Սակայն թե ինչն է եղել վիճակի վատթարացման պատճառը, Սուրեն Մակարյանը խորհուրդ տվեց ճշտել նրանցից, որոնք վիրահատությունը կատարել են: Ի դեպ, «Սլավմեդ» ԲԿ-ի ծննդատան վարիչ Վարդան Ռափյանն էլ նախօրեին հորդորեց մանրամասներ ճշտել այն հիվանդանոցից, որտեղ ծննդկանը մահացել է:
Նշենք, որ կնոջ առաջին ծննդաբերությունն էր: Երեխայի վիճակը բավարար է: