Իտալիայի ՆԳՆ-ն ուժեղացնում է եկեղեցիների եւ լողափերի հսկողությունը Ֆրանսիայում ահաբեկչություններից հետո անվտանգության ուժեղացման շրջանակում, փոխանցում է Stampa-ն:
Պարբերականի տեղեկություններով՝ գերատեսչությունը հատուկ կարգադրություն է արել եկեղեցիների եւ զբոսաշրջային վայրերի, գլխավորապես լողափերի, նաեւ դպրոցների, մշակութային եւ կրթական կենտրոնների նկատմամբ հատուկ հսկողություն սահմանելու մասին: Բացի այդ, քաղաքների պրեֆեկտները կարգադրություն են ստացել ներկայացնելու մարդկանց կուտակման վայրերի՝ կինոթատրոնների, թատրոնների, հրապարակների եւ առեւտրի կենտրոնների մանրամասն ցանկ, ինչպես նաեւ այդ կառույցների հատակագծերը՝ հնարավոր ահաբեկիչների փախուստի երթուղին որոշելու համար, նաեւ ուղղաթիռների վայրէջքների տարածքները եւ շտապօգնության մեքենաների համար մուտքերը:
Իտալական իշխանությունները նաեւ միջոցառումներ են անցկացնում ահաբեկչական սպառնալիքը կանխելու համար: Այդ աշխատանքի ամենակարեւոր ուղղություններից մեկը բանտերի մոնիտորինգն է, որոնց ներսում կարող են տարածվել ծայրահեղականությունն ու արմատականությունը:
