Ֆրանսիայի իշխանությունները պարզել են Ռուանի արվարձանում կաթոլիկ եկեղեցու վրա հարձակված երկրորդ ահաբեկչի ինքնությունը, հայտնում է AFP–ն՝ վկայակոչելով դատախազությանը։

Ավելի վաղ պաշտոնապես հաստատվել էր միայն մեկ հարձակվողի ինքնությունը՝ Ադել Ք., որը հայտնի էր հատուկ ծառայություններին, քանի որ երկու անգամ փորձել էր Սիրիա մեկնել, սակայն ձերբակալվել էր Թուրքիայում եւ արտահանձվել Ֆրանսիա, որտեղ նախնական կալանքի տակ էր վերցվել ահաբեկիչների հետ կապ ունենալով հետաքննության գործով։ Նրան ազատ էին արձակել էլեկտրոնային թեւնոցով։

Երկրորդ ահաբեկիչը 19-ամյա Աբդել Մալիք Փեթիջանն է, որը հունիսի վերջից հետախուզվում էր Սիրիա մեկնելու փորձի համար։ Նախկինում նա դատվածություն չի ունեցել։

Հիշեցնենք, որ հուլիսի 26-ին դանակներով զինված 2 ահաբեկիչ հարձակվել էին Սենթ Էթյեն դյու Ռուվրեի եկեղեցու վրա եւ սպանել հոգեւորականին։