Հայ-իրանական տնտեսական հարաբերությունները վերջին տարիներին դինամիկ զարգանում են: Այս մասին, այսօր՝ հուլիսի 28-ին, Թեհրանի նահանգապետարանի պատվիրակության հետ հանդիպման ժամանակ նշել է ՀՀ գյուղատնտեսության նախարար Սերգո Կարապետյանը:
Իրանական պատվիրակությունը գլխավորում է նահանգապետի տնտեսության եւ պաշարների զարգացման հարցերով տեղակալ Մոհամմադ Էմամի Ամինը: Հանդիպմանը ներկա էր նաեւ Իրան-Հայաստան առեւտրական պալատի նախագահ Լեւոն Ահարոնյանը:
Գյուղնախից NEWS.am-ին հայտնում են, որ այցի նպատակն էր քննարկել երկկողմ համագործակցության ընդլայնման հեռանկարները գյուղատնտեսության ոլորտում:
«Հայ-իրանական տնտեսական հարաբերությունները վերջին տարիներին դինամիկ զարգանում են, եւ ես վստահ եմ, որ երկու երկրների միջեւ մուտքի արտոնագրային ռեժիմի վերացումն ավելի կնպաստի տարբեր ոլորտներում, այդ թվում` նաեւ գյուղատնտեսության բնագավառում փոխգործակցության ակտիվացմանն ու խորացմանը», - ողջունելով հյուրերին` նշել է նախարար Սերգո Կարապետյանը:
Պատվիրակության անդամներն իրենց հերթին տեղեկացրել են, որ նկատի ունենալով Հայաստանի անդամակցությունը Եվրասիական տնտեսական միությանը, Թեհրանի նահանգապետարանը հետաքրքրված է ԵՏՄ երկրներ գյուղատնտեսական արտադրանքի արտահանման կազմակերպմամբ:
Արտահանման գործընթացն առավել արդյունավետ կազմակերպելու նպատակով նախարարն առաջարկել է հյուրերին ուսումնասիրել համատեղ ընկերությունների ստեղծման հնարավորությունը` պատրաստի արտադրանքը դեպի ԵՏՄ շուկա արտահանելու նպատակով:
Հանդիպման ավարտին Սերգո Կարապետյանը վերահաստատել է պատրաստակամությունն աջակցություն ցուցաբերել գյուղատնտեսության բնագավառում երկու երկրների համագործակցության սերտացմանն ուղղված նախաձեռնություններին:
