Նախօրեին ՀՀ ոստիկանության գործողությունները Խորենացի փողոցում բացարձակապես անմիտ ու անօրինական էին: Այս մասին, այսօր՝ հուլիսի 28-ին, լրագրողների հետ հանդիպման ժամանակ նշել է Հայաստանի դեմոկրատական կուսակցության ղեկավար Արամ Գ. Սարգսյանը:
Նրա խոսքով, եթե լսենք ոստիկանության պարզաբանումները, նրանք ասել են, թե իբր կասկածներ ունեն, որ մարդկանց մոտ զենք կա. «Այսինքն այդպես կարելի է բերման ենթարկել փողոցում գտնվող ցանկացած մարդու: Տպավորություն էր, որ մենք գտնվում ենք Թուրքիայում, որտեղ հեղաշրջման փորձ է կատարվել եւ ձերբակալվել 13 հազար մարդ: Սա ամենասխալ եւ ամենավտանգավոր քաղաքական գիծն է, որն իրականացնում են ՀՀ իշխանությունները»,-ընդգծել է Սարգսյանը:
Նրա խոսքով, ՀՀ իշխանությունները պարտավոր են հաշվետու լինել սեփական ժողովրդին, քանի որ ժողովուրդը ներքին լուրջ ու արմատական փոփոխություններ անցկացնելու պահանջ է դրել իշխանությունների առջեւ: «Իսկ հասարակական կարծիքն այսօր հանգում է հետեւյալին. Իշխանությունները չեն լուծել ներքին խնդիրները»,-ամփոփել է ՀԴԿ ղեկավարը:
Հիշեցնենք, որ Ոստիկանության աշխատակիցները հուլիսի 27-ին Խորենացի փողոցից բերման են ենթարկել բազմթիվ քաղաքացիների՝ ձգտելով թույլ չտալ այնտեղ հանրահավաք անցկացնել: