Ոստիկանության ՊՊԾ գնդում փակված մարդկանց ընտանիքների, հարազատների ուղղակի ահաբեկումը պետական ահաբեկչություն է: Այս մասին այսօր՝ հուլիսի 28-ին, լրագրողների հետ հանդիպմանն ասաց ազգագրագետ Հրանուշ Խառատյանը:
«Ցավոք այս ամենը բացի պետական ահաբեկչությունից այլ բան անվանել չեմ կարող: Բացի այդ հանրությանն այդպես էլ հայտնի չդարձավ, թե այդ ոստիկանապետը որեւէ ձեւով զգաստացվել է, էլ չասեմ, թե այդպիսի բաների համար ուղղակի մարդուն պետք է աշխատանքից հանեն»,-ասաց ազգագրագետը:
Հրանուշ Խառատյանը նշեց, որ հուլիսի 27-ին Երեւանի Խորենացի փողոցից քաղաքացիներին մասսայաբար բերման ենթարկելը մեկ անգամ եւս ապացուցեց, որ տեռորի միջոցով հանրության վրա ճնշում է գործադրվում. «Ես շարունակում եմ հիանալ եւ զարմանալ մեր հանրային վարքի ինքնազսպման վարքի փնտրտուքների վրա: Մենք գործ ունենք բացարձակ բաց հանրային ընդվզման հետ եւ տեռորի միջոցով հանրության վրա ճնշում գործադրելու երեւույթի հետ: Չնայած այն կոչերին, որ խնդիրը պետք է բանակցությունների միջոցով լուծվի, ակնհայտ է, որ եթե կողմեր կան, ապա այդ կողմերից մեկն անընդհատ, շատ կտրուկ ագրեսիվ քայլերի է դիմելու»:
«Իրավունքի գերակայություն» իրավապաշտպան ՀԿ իրավաբան Արա Ղազարյանն էլ նշեց, որ Հայաստանում այսօր իրավիճակը շատ նման է 2002-2004 թ.թ.-ին, երբ մասսայական իրավական կալանքներ էին կիրառվում քաղաքացիների նկատմամբ, երբ մարդկանց բերման էին ենթարկում՝ առանց խտրականության ինչ-որ բան կանխելու համար. «Այս ամենն անիրավաչափ է: Ոստիկանությունը պետք է բերման ենթարկի միայն այն քաղաքացիներին, որոնք խոչընդոտում են խաղաղ հավաքի անցկացմանը, որոնք հնչեցնում են բռնության կոչեր: Սակայն, այս քայլով իշխանությունները փորձում են չեզոքացնել քաղաքացիական ակտիվիզմը»:
Նշենք, որ վերջին օրերին ոստիկանությունը զանգվածաբար բերման է ենթարկում քաղաքացիներին Խորենացի փողոցից եւ հարակից տարածքներից:
