ՀՀ նախագահ Սերժ Սարգսյանը պետք է հրաժարական տա, քանի որ ընտրել է Եվրասիական միությունն ու կեղծել է սահմանադրական փոփոխությունների հանրաքվեն։ Այս մասին հուլիսի 28-ին կայացած մամուլի ասուլիսին ասել է «Ազգային ինքնորոշում» միավորման ղեկավար Պարույր Հայրիկյանը։
Նրա խոսքով՝ այդ իմաստով ՊՊԾ գունդը գրաված զինված խումբը շատ արդարացի են պահանջում նրա հրաժարականը։ «Սերժ Սարգսյանը 3.5 տարի եվրաասոցիացիայի շուրջ բանակցություններ էր վարում, իսկ հետո Պուտինի հետ մեկ հանդիպման արդյունքում լրիվ հակառակ որոշումը կայացրեց։ Եթե Սարգսյանը պահպաներ գոնե իր կուսակցության մեջ ձեւական ժողովրդավարությունը, նա հարցը կդներ կուսակցական խորհրդի նիստում։ Իսկ նա ամեն բան որոշեց միայնակ օտարերկրյա պետության ղեկավարի հետ հանդիպումից հետո»,– ասել է Հայրիկյանը։
Երկրորդ պատճառը, ըստ որի Սերժ Սարգսյանը պետք է հրաժարական տա, սահմանադրական հանրաքվեի կեղծումն էր։ Նրա խոսքով՝ դեմ է քվեարկել 70 տոկոսը, սակայն իշխանություններն ամեն բան փոխել են իրենց ուզածով։
Իրեն սադրիչ համարողներին նա զրպարտիչներ է ավանել։ «Այո, երեկ ես մարդկանց ասել եմ, որ ցրվեն։ Իսկ էլ ու՞ր պիտի գնայինք մենք։ Գնայինք տուն, որպեսզի վաղը, մյուս օրն ավելի կազմակերպված հավաքվենք։ Իսկ ինչ է՝ մենք հանրահավաքներ ենք ունեցել, որոնցից հետո տուն չե՞նք գնացել»,– ասել է Հայրիկյանը։
