Նախօրեին ՊՊԾ գունդը գրաված զինված խմբի անդամների հանդեպ իշխանությունների նախաձեռնած գործողություններն ուղղված չեն նրանց սպանելուն, այլ այնպես խեղելուն, որպեսզի մինչեւ կյանքի վերջ հաշմանդամ մնան: Այս մասին այսօր մամուլի ասուլիսին հայտարարել է առաջին օմբուդսմեն, «Ընդդեմ իրավական կամայականության» հասարակական կազմակերպության գործադիր տնօրեն Լարիսա Ալավերդյանը:
Նրա խոսքով՝ պետությունը պարտավոր է զինված խմբի անդամներին ապահովել անհրաժեշտ բժշկական օգնությամբ: Ալավերդյանը համաձայն է, որ մարդկանց անազատության մեջ պահելը, այդ թվում՝ բժիշկներին, նույնպես չի կարելի:
«Իրադարձություններն այնպես են զարգանում, որ նրանց խեղելու կամ բժշկական օգնություն չապահովելու իշխանությունների ցանկությանը հետեւեցին խմբի այսպիսի գործողությունները: Իշխանությունները գնում են ճգնաժամային վիճակի սրացման, ինչին պատասխանում են զինված խմբի անդամները»,- նշել է Լարիսա Ալավերդյանը՝ շարունակելով, որ իր բռնի գործողություններով իշխանությունները կարծես ապացուցում են, որ հանրությունը ճիշտ է մտածում՝ այս ղեկավարությունն անընդունակ է երկիրը կառավարել կառավարման բավական հարուստ համակարգի եւ ոչ մի այլ մեթոդով, քան հարկադրանքը, սարսափահար անելը, պատժամիջոցները եւ ձերբակալությունները՝ դրան հետեւող դատական գործընթացով:
