Ոստիկանության ՊՊԾ գունդը գրավելուց հետո Երեւանում ոստիկանների եւ քաղաքացիների միջեւ տեղի ունեցած բախումների հետեւանքով տուժած քաղաքացիները պետք է դիմումներ ներկայացնեն իրավապաշտպան ընկերություններին եւ մարդու իրավունքների պաշտպանի գրասենյակ ՝ գործերին իրավական ընթացք տալու համար: Այս մասին այսօր՝ հուլիսի 28-ին, լրագրողների հետ հանդիպմանն ասել է ՀՔԱ Վանաձորի գրասենյակի նախագահ Արթուր Սաքունցը՝ նշելով, որ քաղաքացիների բերման ենթարկելու գրեթե բոլոր դեպքերը արձանագրվել են ԶԼՄ-երի կողմից եւ ապացույցներ ներկայացնելու խնդիր չկա:
«Եթե երեկ 80 հոգի բերման է ենթարկվել, ապա 80-նն էլ թող դիմում գրեն: Հիմա այսպիսի մի տենդենց կա, սկսում են մարդկանց համոզել, որ դիմում չգրեն։ Բայց երեկվա Կարմիր բերետավորների պահվածքը խուլիգանություն էր, դրանց դեմ պետք է դիմում գրվի»,-ասաց նա:
Իրավապաշտպան Արա Ղազարյանն էլ նշեց, որ, եթե քաղաքացուն հարցաքննության են կանչում, այն պետք է տեղի ունենա փաստաբանի ներկայությամբ: «Եթե քաղաքացուն փողոցում ոստիկաններ են մոտենում բերման ենթարկելու նպատակով, անհրաժեշտ է նախ խնդրել, որ ոստիկանը ներկայանա, պարզապես հարցնի, թե ինչ հիմքով են իրեն տանում, այնուհետեւ հարցաքննությունը պետք է տեղի ունենա փաստաբանի ներկայությամբ» :
Ազգագրագետ Հրանուշ Խառատյանն էլ տուժած քաղաքացիներին հորդորեց դիմումներ ներկայացնել Մարդու իրավունքների պաշտպանի գրասենյակ: «Եթե անգամ այնտեղ արդյունավետ չեն աշխատում, թող այնտեղ կուտակվեն այդ գործերը. հանրության համար պարզ կդառնա, թե 80 մարդու դիմումից քանիսն են նորմալ ընթացք ստացել» :