ՀՀ ՊՆ վարչական համալիրում հուլիսի 27-ին պաշտպանության նախարար Սեյրան Օհանյանը հանդիպել է «Ռազմական պատմություն» խորագիրը կրող ամառային դպրոցի մի քանի տասնյակ ունկնդիրների հետ եւ դասախոսություն կարդացել նրանց համար:
ՊՆ-ից NEWS.am-ին հայտնում են, որ պաշտպանության նախարարը ունկնդիրների համար դասախոսություն է կարդացել՝ նվիրված հայկական բանակի կազմավորմանն ու Արցախյան ազատամարտի ռազմական գործողությունների առանձնահատկություններին: Սեյրան Օհանյանը համոզմունք է հայտնել, որ նման հանդիպումները կդառնան ավանդական եւ կնպաստեն ռազմական պատմության ուսումնասիրմանն ու գիտական ընթացք տալուն:
«Հայկական բանակի առանձնահատկությունը կարելի է բաժանել 2 խմբի՝ ազգային եւ ռազմական: Ազգային բնույթի առանձնահատկություններն այն են, որ մենք կարողացել ենք հասնել հաջողությունների հայ ժողովրդի միասնության, ուժի, համախմբման միջոցով: Բանակում ձեւավորվեց կառավարման համակարգ եւ ամրապնդվեց կարգապահությունը: Ինչ վերաբերում է ռազմական առանձնահատկություններին, թեպետ հայկական բանակը երիտասարդ էր եւ նոր էր ձեւավորվում, սակայն մարտական բոլոր գործողությունները կազմակերպվել են համաձայն ռազմական գիտության ժամանակակից պահանջների»,- ասել է պաշտպանության նախարարը ՝ հավելելով, որ Արցախյան հերոսամարտի ժամանակ շատ են եղել դեպքեր, երբ իրականություն է դարձել «փոքր ուժերով մեծ խնդիրներ լուծելու» գաղափարը, երբ դասակի կամ վաշտի ուժերով կարողացել են ծնկի բերել մի ամբողջ զորամասի: Այս առումով նախարարը կարեւորել է հրամանատարների անձնական օրինակն ու դիրքերի լավ իմացությունը: Խոսելով զինված ուժերի ժամանակակից մարտահրավերների մասին, նախարարը նշել է, որ այսօր հայկական բանակը գտնվում է բարեփոխումների ակտիվ փուլում եւ վերջին տարիներին բանակում ներդրված բարեփոխումները, նոր խնդիրների առաջադրումն ու դրանց իրականացումը միայն դրական ազդեցություն են ունեցել զինված ուժերի զարգացման վրա: Այս առումով շեշտվել է, որ բարեփոխումները լինելու են շարունակական:
Դասախոսության ավարտին Սեյրան Օհանյանը պատասխանել է նաեւ ունկնդիրների հարցերին:
Հիշեցնենք, որ «Ռազմական պատմություն» խորագիրը կրող դասախոսության մեկնարկը տրվել էր հուլիսի 1-ին: Դասախոսությունների շրջանակում մասնակիցները հնարավորություն են ունեցել հանդիպել ռազմական փորձագետների, պատմաբանների ու վերլուծաբանների: Ամառային դպրոցի նպատակն է ծանոթացնել երիտասարդներին հայ ռազմարվեստի եւ համաշխարհային ռազմական պատմության առանցքային հարցերին:
