Հայաստանի հանրային խորհուրդը պետք է հրավիրի երկրի նախագահին եւ ՀԿ–ների ներկայացուցիչներին ստեղծված վիճակը քննարկելու համար։ Այս մասին հուլիսի 28-ին կայացած մամուլի ասուլիսի ժամանակ ասել է Հայաստանի առաջին օմբուդսմեն, «Ընդդեմ իրավական կամայականության» ՀԿ գործադիր տնօրեն Լարիսա Ալավերդյանը։ Նրա խոսքով՝ եթե իշխանություններն ի վիճակի չեն կառավարել երկիրը, պետք է հրաժարական տան։
Մամուլի ասուլիսի մեկ այլ մասնակիվ, Դեմոկրատական կուսակցության նախագահ Արամ Սարգսյանի խոսքով՝ ներկայիս վիճակը երկրում չի գոհացնում հասարակությանը։ «Դա նշանակում է, որ իշխանությունները չեն վարում այն քաղաքականությունը, որն անհրաժեշտ է երկրի զարգացման համար։ Հետեւաբար Կառավարությունը պետք է հրաժարական տա, պետք է ձեւավորվի այնպիսի կառավարություն, որը վայելում է ժողովրդի վստահությունը։ Մարդիկ իրական եւ լուրջ փոփոխություններ են սպասում»,– ասել է Արամ Սարգսյանը։
