Ոստիկանության ՊՊԾ գունդը գրոհելուց հետո, իշխանություններն ամեն ինչ անում են, որ հայը հայի վրա զենք չբարձրացնի եւ արյունահեղություն եւ նոր զոհեր չլինեն: Այս մասին այսօր՝ հուլիսի 28-ին, ՀՀԿ ԳՄ նիստից հետո լրագրողների հետ հանդիպմանն ասել է ՀՀ ԱԺ փոխնախագահ Հերմինե Նաղդալյանը:
Հերմինե Նաղդալյանը նշեց, որ երկրում ստեղծված իրավիճակը պետք է խաղաղ հանգուցալուծում ունենա, որի համար իշխանությւոններն անում են ամեն ինչ: «Խնդիրները, որոնց մասին այս օրերին խոսվում են, տարիների ընթացքում կուտակված խնդիրներ են եւ այժմ բարեփոխումներ են ընթանում, դրանց ուղղությամբ ՀՀԿ-ն աշխատել է, աշխատում է եւ շարունակելու է աշխատել: Սակայն, այսօր դրանք բոլորը ստվերում են մեկ եւ գլխավոր հարցով՝ իրավիճակը պետք է հանգուցալուծվի առանց արյունահեղության: Բոլորիս համար, պետականության համար շատ կարեւոր է, որպեսզի մենք կարողանանք այս ամենից ճիշտ դասեր քաղենք: Համարում եմ, որ մեր երկրում ոչ ոք իրավունք չունի զենք վերցնել եւ կրակել դիմացինի վրա: Հայաստանում որեւէ մեկը իրավունք չունի զենքով որեւէ հարցի լուծման գնալ»,-ասաց նա:
Նա նշեց, որ այս իրադարձությունները մտահոգիչ են ինչպես պետության հետագա զարգացման, ամրապնդման, այնպես էլ Լեռնային Ղարաբաղի խնդրի լուծման իմաստով. «Եթե խոսվում է հողերի հանձնման մասին, պետք է նախ հասկանանք՝ ինչ ունենք իրականության մեջ, ինչ բանակցություններ կարող են սկսվել եւ ընթանալ Մինսկի խմբի համանախագահների, ՀՀ եւ Ադրբեջանի նախագահների միջեւ: Չեմ կարծում, որ ինչ-որ մեկը կարող է ասել, որ ՀՀ իշխանությունները երբեւիցե կգնան նրան, որ ազատագրված հողերը հանձնվեն»:
Լրագրողի հարցին՝ ինչու՞ ՀՀԿ-ն հասցրեց այն վիճակին, որ «Սասնա ծռերը» զենք վերցրեց եւ գրոհեց ոստիկանության ՊՊԾ գունդը, Հերմինե Նաղդալյանը պատասխանեց, որ դա սուբյեկտիվ կարծիք է եւ ՀՀԿ-ն այդ վիճակին չի հասցրել:
Անդրադառնալով ոստիկանության ՊՊԾ գնդում գտնվող բժիկներին՝ Հերմինե Նաղդալյանը նշեց, որ անընդունելի է, երբ աշխարհի ամենամարդասիրական մասնագիտության ներկայացուցիչները անազատության մեջ են պահվում, երբ նրանք այնտեղ էին գնացել նրանց օգնություն ցույց տալու համար. «Շատ անհանգստացած ու մտահոգ ենք, հուսով եմ, որ նրանց ազատ կարձակեն եւ կկարողանան բուժօգնություն ցույց տալ նրանց, որոնք բուժօգնության կարիք ունեն»:
