Ոստիկանության պարեկապահակային գնդում արդեն 2-րդ օրը գտնվող բուժաշխատողներին այսօր սնունդ եւ դեղորայք է փոխանցվել: Այս մասին NEWS.am-ին ասաց Երեւանի «Շտապօգնություն» ՓԲԸ-ի տնօրեն Թագուհի Ստեփանյանը:
«Մենք սնունդ ենք փոխանցել մեր աշխատողներին, հետն էլ դեղորայք ենք ուղարկել, սովորական դեղեր, որոնք «Շտապօգնության» մեքենայում միշտ ունենում ենք»,- ասաց Թագուհի Ստեփանյանը:
Նա հայտնեց, որ ներսում երկու վիրավոր կա, որոնցից մեկը վիրահատության կարիք ունի: Նշենք, որ «Սասնա ծռեր» խումբը պահանջում է բուժաշխատողների փոխարեն ուղարկել վիրաբույժների, որոնք գնդի տարածքում վիրահատություններ կիրականացնեն: Իրավապահ մարմինները դեռեւս չեն համաձայնվում: Թագուհի Ստեփանյանի խոսքով էլ ներսում անհրաժեշտ պայմաններ չկան:
Ավելի վաղ հաղորդագրություն էր տարածել նաեւ Առողջապահության նախարարությունը. «ՀՀ առողջապահության նախարարությունը, միանալով մեր բազմաթիվ քաղաքացիների և բժշկական հանրության հորդորներին, ևս մեկ անգամ կոչ է անում առանց որևէ նախապայմանի ազատ արձակել պատանդառության մեջ գտնվող բուժաշխատողներին: Երեկ բուժակին ազատ արձակելու խոհեմ քայլը միայն դրական արձագանք է ստացել հանրության շրջանում։ Բայց և հանրությունը չի կարող ընդունել այն փաստը, որ ձեռք է բարձրացվում մարդասիրական առաքելություն իրականացնող մասնագետների նկատմամբ, ովքեր մեր երկրի համար ստեղծված լարված ու դժվարին այս օրերին գիշեր ու զօր, առանց տրտունջի, անկախ բոլոր հանգամանքներից շարունակում են բարձրակարգ բժշկական օգնություն տրամադրել ինչպես բոլոր քաղաքացիներին, այնպես էլ` վիրավորումներ ստացած տուժածներին` պատվով կատարելով մասնագիտական իրենց պարտքը, հավատարիմ մնալով իրենց երդմանը»:
