Գյումրիում նախօրեին բողոք երթ է տեղի ունեցել` ի պաշտպանություն զինված խմբի անդամների եւ ձերբակալված անձանց:
Շիրակում NEWS.am-ի թղթակիցը հաղորդում է, որ երիտասարդները երթը սկսել են քաղաքի թատերական հրապարակից եւ շրջել կենտրոնական փողոցներով` կոչ անելով գյումրեցիներին դուրս գալ եւ պայքարել իրենց հետ: Ցուցարարները երթով հասել են Ոստիկանության Կումայրու բաժնի մոտ եւ հորդորել ոստիկանությանը միանալ երթին եւ լինել ժողորդի կողքին: Նրանք նաեւ պահանջել են ազատ արձակել ձերբակալվածներին, այդ թվում՝ Գյումրի լրագրողների «Ասպարեզ» ակումբի նախագահ Լեւոն Բարսեղյանին։
Երթն ուղեկցում էին մի քանի տասնյակ ոստիկաններ:
«Մեր իրազեկման երթն ավարտվեց եւ ակնկալում ենք, որ գյումրեցիներն այս պրոցեսի նկատմամբ անտարբեր չեն լինի, ամեն երեկո կհավաքվեն եւ իրենք կորոշեն ինչ անել»,- երթից հետո հայտարարեց մասնակիցներից Արմեն Ներսիսյանը:
