Արդեն 13-րդ օրն է, ինչ Երեւանի Խորենացի փողոցում «Սասնա ծռեր» զինված խումբը գրոհով վերցրել է ոստիկանության ՊՊԾ գունդը։

Այս պահին Խորենացի փողոցում հանգիստ է, գիշերվա ընթացքում եւս միջադեպեր չեն գրանցվել: 

Նախօրեին երեկոյան հորդ անձրեւի տակ կրկին հանրահավաք է տեղի ունեցել  Ազատության հրապարակում՝ ի աջակցություն ՊՊԾ գունդը գրաված «Սասնա ծռեր» զինված խմբի։ 

Ցուցարարները ցանկացել են երթ անել դեպի Բաղրամյան պողոտա, սակայն ոստիկանությունը հայտարարել է, թե արգելելու է։

«Ժառանգություն» կուսակցության ներկայացուցիչ Արմեն Մարտիրոսյանը հայտնել է, որ արդեն նոր փուլ են սկսում։ «Նախորդ փուլը «Սասնա ծռերի» պահանջների լեգիտիմացումն էր, եւ ժողովրդի շնորհիվ այդ փուլը անցանք։ Ակնհայտ է, որ մտել ենք քաղաքական փուլ։ Պահանջները հստակ ձեւակերպված են։ Երկրորդ փուլում պիտի անցնենք կոնկրետ գործողությունների»,- ասել է Մարտիրոսյանը՝ կոչ անելով Հայաստանի եւ սփյուռքի բոլոր անկյուններում ինքնակազմակերպվել, սկսել քաղաքացիական անհնազանդության քայլեր։

Ոստիկանությունը մեծ ուժեր է կենտրոնացրել Բաղրամյան պողոտայում եւ փակել այն: Ցուցարարների երթը հորդառատ անձրեւի տակ հասել է Բաղրամյան պողոտայի սկզբնամաս, այստեղ են Երեւանի ոստիկանապետ Աշոտ Կարապետյանն ու նրա տեղակալ Վալերի Օսիպյանը։

Արմեն Մարտիրոսյանը հայտարարել է, որ իրենց նպատակն էր նախ պիկետ անել Բաղրամյան պողոտայի սկզբնամասում, ապա երթով գնալ դեպի Խորենացի փողոց։ Առաջին մասը ստացվեց, բայց Խորենացի գնալուն խանգարեց անձրեւը։ 

Այդուհանդերձ, պայքարը չի դադարելու։ «Պայքարը չպետք է դադարի։ Իսկ դրա համար պետք է այժմ գնալ տուն, տաքանալ, վաղը նորից հավաքվել Ազատության հրապարակում»,- ասել է նա՝ նշելով, որ կրկին դիմելու են անհնազանդության քայլերի։

Ի վերջո, Ֆրանսիայի հրապարակը փակելուց և երթևեկությունը կաթվածահար անելուց հետո ցուցարարները վերադարձել են Ազատության հրապարակ, որտեղից էլ սկսել են ցրվել: