Fitch վարկանիշային գործակալությունը Հայաստանի մակրոտնտեսական կայունությունը գնահատում է որպես ոչ վատ։ Այս մասին հուլիսի 29-ին լրագրողներին ասել է ՀՀ ԿԲ փոխնախագահ Ներսես Երիցյանը՝ մեկնաբանելով Fitch–ի վարկանիշում Հայաստանի ցուցանիշի թարմացումը («B+» կայուն կանխատեսմամբ, երկարաժամկետ վարկանիշի գնահատականը արտարժույթով եւ ազգային արժույթով)։
«B+» վարկանիշը բխում է Հայաստանում հարաբերականորեն բարենպաստ բիզնես միջավայրից, բնակչության մեկ շնչին բաժին ընկնող ՀՆԱ հարաբերականորեն բարձր մակարդակից, ԱՄՀ–ի հետ Extended Arrangement ծրագրից եւ պետական պարտքի ցածր դրույքներից։ Բացասաբար է ազդում բարձր արտաքին պարտքը, ինչպես նաեւ դրա բարձր տեսակարար կշիռը արտարժույթով։ Խանգարում են նաեւ բանկային սեկտորի բարձր դոլարացումն ու որոշ հարեւան երկրների հետ խնդիրները։
Fitch–ը նշում է, որ Հայաստանում տնտեսական աճն ավելի բարձր է եղել, քան նրանք ակնկալում էին։ «Գործակալությունը մակրոտնտեսական կայունությունը գնահատում է ոչ վատ, այդ պատճառով կանխատեսումը կայուն է»,– ասել է Երիցյանը։
Հիշեցնենք, որ Հայաստանի տնտեսական աճը 2016-ի առաջին եռամսյակում կազմել է 4.4 տոկոս։
