Մարդու իրավունքների պաշտպանի ներկայացուցիչները նախօրեին այցելել են «Դատապարտյալների հիվանդանոց» քրեակատարողական հիմնարկ՝ տեսակցելու Ոստիկանության ՊՊԾ գնդի տարածքում հուլիսի 27-ին վիրավորված եւ քրեակատարողական հիմնարկում գտնվող Արամ Մանուկյանին, Հովհաննես Հարությունյանին եւ Աշոտ Պետրոսյանին:
Քրեակատարողական հիմնարկի սանիտարական պայմանները հատուկ կրկնակի ստուգելու նպատակով այսօր նույնպես աշխատակազմի ներկայացուցիչներն այցելել են քրեակատարողկան հիմնարկ՝ հաշվի առնելով զանգվածային լրատվության միջոցներում փաստաբանների մտահոգությունները կալանավորված անձանց պահման պայմանների վերաբերյալ:
Հիշեցնենք, պաշտպաններն ահազանգում են, որ «Սասնա ծռերի» վիրավոր անդամների համար այստեղ բավարար պայմաններ չկան։ Մասնավորապես Հովհաննես Հարությունյանի պաշտպան Արայիկ Պապիկյանը NEWS.am-ին հայտնել է, որ իր պաշտպանյալի համար սանիտարահիգիենիկ պայմանները բավարար չեն, եւ որ իր տեսակցության ժամանակ խավարասերներ է նկատել հիվանդասենյակում:
Արամ Մանուկյանի պաշտպան Ինեսա Պետրոսյանն էլ նշել է, որ Արամի սենյակը գտնվում է խոնավության մեջ, պատերը բորբոսնած են. «Վիրահատությունից նույնիսկ 24 ժամ չէր անցել, այդ պայմաններում, հատկապես նոր վիրահատված հիվանդը, շատ արագ կարող է անգամ արյան վարակ ստանալ»:
