Գյումրիի «Ասպարեզ» ակումբի ղեկավար Լեւոն Բարսեղյանը 16 ժամ որեւէ կարգավիճակ չունենալով եղել է անազատության մեջ: Այս մասին այսօր՝ հուլիսի 29-ին, լրագրողների հետ հանդիպման ժամանակ նշել է ՀՀ Ոստիկանության ՁՊՎ-ներում վերահսկողություն իրականացնող հասարակական դիտորդական խմբի անդամ Սուրեն Իսկանդարյանը:
Նրա խոսքով, Լեւոն Բարսեղյանին բերման են ենթարկել հուլիսի 27-ի գիշերը ժամը 2.30-ին: Հետո առավոտյան տեղափոխել են Գյումրիի ոստիկանության «Կումայրի» բաժին:
«Ամենազավեշտալին այն է, որ մարդուն պահում են անազատության մեջ, բայց նրան հանձնում են ծանուոցագիր հարցաքննության ներկայանալու համար: Երբ մարդը ասում է՝ ծանուցագիրը ստորագրեցի, ստացա, ազա՞տ եմ, պատասխանում են՝ ոչ, մենք ձեզ կուղեկցենք: Գյումրիից նորից բերում են ոստիկանության Շենգավիթի բաժին: Տեղ են հասնում 16.10-ին, ունենում են մոտ 40 րոպե ժամանակ մինչ հարցաքննություն սկսելը:
Լեւոն Բարսեղյանն ասում է՝ ես ազատ մարդ եմ, ձերբակալված չեմ, բայց նրան թույլ չեն տալիս հեռանալ: Ոստիկանության Շենգավիթի բաժնում նա փորձ է արել դեպի դուռը շարժվել, ապացուցելու համար, որ իր ազատ տեղաշարժը սահմանափակում են:
Այսօր երեկոյան ժամը 02.15 րոպեին նրա ձերբակալման 72 ժամը լրանում է, նրան կամ պետք է ազատ արձակեն, կամ կալանավորեն»,-նշեց Իսկանդարյանը:
Անդրադառնալով այն փաստին, որ Լեւոն Բարսեղյանի մոտ դանակ է հայտնաբերվել, նա նշեց, որ Լեւոն Բարսեղյանը հայտարարել է, որ նախորդ տարի Բաղրամյանի դեպքերի ժամանակ իրեն ոստիկանության Նորք Մարաշի բաժին են տարել, դանակը հետն է եղել, վտանգ չեն տեսել, վերադարձրել են ու ազատ արձակել:
«Լեւոն Բարսեղյանը 16 ժամ որեւէ կարգավիճակ չի ունեցել, բայց եղել է անազատության մեջ: Այդ ամենը թաքցնելու համար պիտի ասեն, որ ազատ են արձակել, նա գնացել հանգստացել է ու եկել հարցաքննության: Բարսեղյանը պաշտոնապես հայտարարում է, որ ոչ ոք իրեն ազատ չի արձակել: Եթե ոչ, թող սուտ մատնության համար գործ հարուցեն»,-ասաց Իսկանդարյանը:
Նշենք, որ Գյումրիի «Ասպարեզ» ակումբի ղեկավար Լեւոն Բարսեղյանի մոտ խուզարկությամբ դանակ է հայտնաբերվել: Նրա դեմ քրգործ է հարուցվել Քրօրի 235 4-րդ մասով (ապօրինի կերպով սառը զենք կրելը): Լեւոն Բարսեղյանը ձերբակալվել է:
