Վերջին օրերին Հայաստանի ՁՊՎ-ներ բոլոր բերման ենթարկվածներն անխտիր ունեցել են մարմնական վնասվածքներ: Այս մասին, այսօր՝ հուլիսի 29-ին, լրագրողների հետ հանդիպման ժամանակ նշեց ՀՀ Ոստիկանության ՁՊՎ-ներում վերահսկողություն իրականացնող հասարակական դիտորդական խմբի անդամ Սուրեն Իսկանդարյանը:
Նրա խոսքով, հուլիսի 20-ի լույս 21-ի գիշերը, երբ սկսեցին ձերբակալությունները, դիտորդական խմբում շտաբ է ձեւավորվել, այցելություններ է կատարում բոլոր ՁՊՎ-ներ, այդ թվում մարզային: «Ահազանգեր ունեինք, որ անհետ կորածներ կան, հարազատները տեղեկություն չունեին: Հայտնաբերեցինք, որ մարզային ՁՊՎ-ներում են պահում, հիմնավորելով, որ Երեւանում տեղ չկա: Հուլիսի 20-21-ին ձերբակալվեց 136 անձ, որից կալանավորվեցին միայն 6-ը: Ամենացավալին այն է, որ կարող են բերման ենթարկել հարյուր մարդու, որից կալանավորվում է միայն 3-4 հոգի: Սա մի գործողություն է, որ ոստիկանությունը մարդկանց վախեցնելու նպատակ ունի: Երբ 95 տոկոսին ազատ են արձակում, մտորելու տեղիք է տալիս, որ դրանց մի մասն առնվազն անհիմն են բերման ենթարկել: Ում հետ խումբը հանդիպել է, բոլորի մոտ անխտիր եղել է մարմնական վնասվածք: ՁՊՎ-ում կա վերահսկողություն, այնտեղ ամեն ինչ գրանցվում է, իսկ ոստիկանական բաժանմունքներում այլ կերպ են աշխատում»,-ասաց նա:
Իրավապաշտպանը նշեց, որ Դիտորդական խմբի 10 տարվա փորձը ցույց է տվել, որ եթե ոստիկանությունն ասում է, որ բերման ենթարկելիս դիմադրություն են ցույց տվել, այդ ժամանակ են մարմնական վնասվածքներ ստացել, ապա պետք է փաստել, որ կային մարմնական վնասվածքներ, որոնք բերման ենթարկելիս չէին կարող առաջանալ, օրինակ աչքի տակի այտուցը, կապտուկը:
«Ցավալի է, որ 64 մարդ բերման է ենթարկվում, ձերբակալվում է մեկ մարդ: Որպես իրավապաշտպան, ուզում եմ փաստել, որ օրենքի որեւէ կետով կանոնակարգված չէ բացի ոստիկանությունից որեւէ տեղ տեղափոխելը, այդ թվում զորամասում պահելը: Սա ապօրինություն է: Այսինքն այդ գործողություններն արվում է մարդկանց մեկուսացնելու համար»,-ասաց նա:
Իսկանդարյանի խոսքով, իրենք Կոտայքում գտնվող ՁՊՎ-ում հանդիպել են նաեւ Հանրային խորհրդի անդամ Արշակ Սադոյանի որդու՝ Արեգ Սադոյանի հետ, ում բերման էին ենթարկել Հանրապետության հրապարակից՝ մեքենայից իջնելիս: Նրան կալանավորել են: