Վաղ է իրավական գնահատական տալ, թե ՊՊԾ գնդում գտնվող շտապօգնության բժիշկների բրիգադը պատանդի կարգավիճակո՞ւմ է, թե ոչ։ Այս մասին «Շանթ» հեռուստաընկերության «Հեռանկար» հաղորդաշարում հայտարարել է ՀՀ գլխավոր դատախազ Գեւորգ Կոստանյանը։
«Բայց եթե նրանք գտնվում են այնտեղ իրենց կամքին հակառակ եւ եթե բռնության կամ սպառնալիքի միջոցով սահմանափակված է իրենց ազատ տեղաշարժվելու կամ այդ վայրը լքելու իրավունքը, ուրեմն պատանդ են»։
Անդրադառնալով ոստիկանության ՊՊԾ գունդը զինված գրաված «Սասնա ծռեր» խմբի գործողություններին՝ գլխավոր դատախազը առայժմ խուսափել է իրավական գնահատական տալ. «Սասնա ծռեր» խմբի անդամների նկատմամբ քրեական գործը հարուցված է ՀՀ քրեական օրենսգրքի 219-րդ եւ 235-րդ հոդվածների հատկանիշներով՝ շենք-շինություններ, կապի եւ տրանսպորտի միջոցներ զավթելը եւ ապօրինի զենք-զինամթերք պահելը, դեռեւս չի խոսում այն մասին, որ այս պահին հնարավոր է խոսել արարքի վերջնական իրավական գնահատականի մասին, որովհետեւ մեղադրանքներն առաջադրելու ժամանակ կարող են ի հայտ գալ նոր հանգամանքներ, որոնք կարող են այլ իրավական գնահատականի հիմք դառնալ եւ այլն»:
Նա նշել է, որ միջազգային իրավական փաստաթղթերում ապստամբության իրավունքի մասին որեւէ դրույթ չկա։
«Ապստամբության իրավունք որեւէ միջազգային փաստաթղթերում չկա, եւ հատկապես Հայաստանի կողմից վավերացված որեւէ միջազգային պայմանագրերում: Հայաստանի օրենսդրությամբ եւս չկա ապստամբելու իրավունք, որովհետեւ ապստամբելու իրավունքը դասական քաղաքական կամ քաղաքացիական իրավունքի դրսեւորում չէ: Եվ դրանով է պայմանավորված այն հանգամանքը, որ թե՛ Մարդու իրավունքների եւ ազատությունների պաշտպանության կոնվենցիայում, թե՛ ՄԱԿ-ի քաղաքացական ու քաղաքական իրավունքների դաշնագրում ընդհանրապես խոսք չկա։ Միջազգային միակ փաստաթուղթը, որում խոսվում է ապստամբության մասին, Մարդու իրավունքների համընդհանուր հռչակագիրն է։ Հռչակագրում այս մասին խոսելը դեռեւս չի նշանակում այն որակել որպես իրավունք: Ինչու, որովհետեւ այդ Հռչակագրում ապստամբության մասին խոսվում է ներածության մեջ` Պրեամբուլայում, իսկ հաջորդող տեքստում շարադրվում են մարդու հիմնական իրավունքները»,-նշել է Գեւորգ Կոստանյանը:
Ըստ գլխավոր դատախազի՝ Հռչակագրում ապստամբությունը իրավունք չի դիտարկվում, այլ նշվում է որպես հետեւանք։
Գեւորգ Կոստանյանի՝ խոսքով դասական իմաստով ապստամբությունը բնութագրվում է որպես իշխանությանը կամ իշխանության որեւէ որոշում փոփոխելուն ուղղված միջոցառումներ, բայց ոչ զինված ապստամբություն կամ զինված հարձակում։ Նրա խոսքով՝ անհամաձայնության դրսեւորումները, կարող են արտահայտվել հանրահավաքներում, բողոքի ակցիաներում, կամ՝ խոսքի ազատության դրսեւորումներում:
