ՄԱԿ–ն ու ԵԱՀԿ–ն դատապարտել են մամուլի նկատմամբ հալածանքները Թուրքիայում, որտեղ միայն վերջին 2 օրում կալանավորվել են տասնյակ լրագրողներ, եւ փակվել են բազմաթիվ լրատվամիջոցներ։ ՄԱԿ հատուկ զեկուցող Դեյվիդ Քեյնն ու ԵԱՀԿ՝ մամուլի ազատության հարցերով ներկայացուցիչ Դունյա Միյատովիչը մտահոգված են կոշտ միջոցներով, որոնք Թուրքիան ձեռնարկում է ձախողված հեղաշրջման փորձից հետո։
Թուրքիայի կառավարությունը փակել է եւս երեք լրատվական գործակալություն, 16 հեռուստաալիք, 45 թերթ եւ 15 ամսագիր։ Հեղաշրջման փորձից հետո կալանքի օրդեր է տրվել 89 լրագրողների, 29 պարբերական զրկվել է արտոնագրից, արգելափակվել է 20 կայք։
«Միաժամանակ անկախ լրագրողների կալանքներն ու տպագիր պարբերականների ու հեռուստառադիոընկերությունների փակումը մեծ հարված են հասցնում ազատության սկզբունքներին եւ կառավարության պատասխանատվությանը»,– ասել են Դեյվիդ Քեյն ու Դունյա Միյատովիչը եւ հավելել, որ իրենք վճռականորեն կոչ են անում իշխանություններին վերանայել որոշումներն ու հավատարիմ մնալ մամուլի ազատության ոլորտում ստանձնած պարտավորություններին։
Նրանք նաեւ հիշեցրել են համալսարանների, դպրոցների եւ ՀԿ–ների փակման մասին։