Այսօր՝ հուլիսի 29-ին հրավիրվել է Շուշիի տեխնոլոգիական համալսարանի հոգաբարձուների խորհրդի հերթական նիստը` վարչապետ Արայիկ Հարությունյանի նախագահությամբ, որտեղ ռեկտոր ընտրվել Հովհաննես Թոքմաջյանը:
ԼՂՀ կառավարությունից NEWS.am-ին հայտնում են, որ Համալսարանի ռեկտորի պաշտոնակատար Հովհաննես Թոքմաջյանը նիստում ներկայացրել է համալսարանի ռազմավարական ծրագիրը առաջիկա տարիների համար: Անդրադառնալով կրթօջախի զարգացման հիմնական նպատակներին, խնդիրներին եւ դրանց իրականացման ուղղություններին՝ Հ. Թոքմաջյանը կարեւորել է որակյալ ուսուցման ապահովման, հետազոտական աշխատանքի իրականացման, միջազգային ճանաչման, կրթական մեթոդների բազմակողմանիության եւ ազատականացման հարցերը: Ըստ նրա՝ շուրջ 400 ուսանող ունեցող համալսարանի հիմնական առաքելությունը միջազգային չափանիշներին համապատասխան եւ Արցախի տնտեսական պահանջները բավարարող մասնագետների պատրաստումն է:
Ծրագիրը հավանության արժանացնելուց հետո` խորհրդի անդամներն անցան օրակարգային երկրորդ՝ ռեկտորի ընտրության հարցին: Փակ գաղտնի քվեարկությամբ` 15 կողմ ձայնով Շուշիի տեխնոլոգիական համալսարանի ռեկտոր է ընտրվել Հովհաննես Թոքմաջյանը: Շնորհավորելով նորընտիր ռեկտորին՝ նիստի մասնակիցները նրան մաղթել են հաջողություններ ստանձնած պարտականությունների կատարման ընթացքում:
Իր խոսքում Շուշիի տեխնոլոգիական համալսարանի հոգաբարձուների խորհրդի նախագահ, վարչապետ Արայիկ Հարությունյանը մեծապես կարեւորել է համալսարանի դերը Արցախի տնտեսության եւ կրթական համակարգի հետագա զարգացման գործում: Նա խորհուրդ է տվել կրթօջախի ղեկավարությանը չհրապուրվել ուսանողների քանակով, այլ ցանկացած ձեռնարկման հիմքում դնել որակը, քանի որ միայն այդ դեպքում է հնարավոր ստանալ ակնկալվող արդյունքը:
Նիստում հաստատվել է համալսարանի կառուցվածքը. այն կունենա երկու պրոռեկտոր եւ կգործի 8 ամբիոնով: Խոհրդի անդամների կողմից համալսարանի նախահաշիվն ընդունվել է ի գիտություն եւ հաստատվել հաստիքացուցակը:
Տեղեկատվություն է հաղորդվել նաեւ պրոֆեսորադասախոսական կազմի ամսական բազային աշխատավարձի տեսակարար ցուցանիշների մասին: Խորհուրդը հաստատել է Երեւան քաղաքում համալսարանի ներկայացուցչության կանոնադրությունը:
Նիստի ավարտին քննարկվել են նաեւ կրթօջախի հետագա գործունեության արդյունավետության հետ կապված այլ հարցեր:
