Nasdaq OMX հայկական ֆոնդային բորսան գործարկում է Clearstream միջազգային հաշվարկային համակարգի հակադարձ կապը։ Այս մասին NEWS.am–ի թղթակցին ասել է Nasdaq OMX Armenia–ի գլխավոր տնօրեն Կոնստանտին Սարոյանը։
Նշենք, որ Clearstream քլիրինգային հաշվարկային համակարգն արդեն գործում է Հայաստանում, սակայն մինչեւ վերջերս աշխատում էր միայն մեկ ուղղությամբ՝ երկրից արտասահման գործարքներով, բայց ոչ հակառակը։ Իսկ հիմա այդ կապը կգործի 2 ուղղությամբ։ Այդ դեպքում միջազգային ներդրողները կարող են հայկական բորսայում արժեթղթեր ձեռք բերել՝ Հայաստանում չբացելով դեպո–հաշիվներ (այսինքն՝ անմիջականորեն իրենց հաշիվներից արտասահմանյան բանկերում)։
«Հղումն արդեն գործարկել ենք, աշխատում ենք պոտենցիալ ներդրողների հետ։ Նրանք մեզնից տեղեկություն են հավաքում եւ վերլուծում այն։ Նրանց կողմից մեծ հետաքրքրություն է նկատվում, եւ մոտ ժամանակներս մենք մանրամասն կհայտնենք այդ մասին, ինչպես նաեւ մեր կատարած աշխատանքի մասին»,– ասել է Սարոյանը։
Նրա խոսքով՝ հայկական ֆոնդային շուկայի նկատմամբ հետաքրքրությունը սահմանափակ չէ ո՛չ աշխարհագրորեն (ցանկացողներ կան ե՛ւ մերձավոր, ե՛ւ հեռավոր արտասահմանից), ո՛չ ոլորտներով (հետաքրքրվում են եւ՛ ֆինանսական, ե՛ւ ոչ ֆինանսական ընկերությունները)։