Երեւանի Բաղրամյան պողոտայից այսօր՝ հուլիսի 29-ին, ոստիկանությունը բերման է ենթարկել «Հակաճգնաժամային խորհրդի» անդամ Ալբերտ Բաղդասարյանին: Այս մասին NEWS.am-ի հետ զրույցում ասաց «Հակաճգնաժամային խորհրդի» անդամ Դավիթ Սանասարյանը:
Ալբերտ Բաղդասարայնը գտնվում է ոստկանության Արաբկիրի բաժանմունքում:
Ավելի վաղ տեղեկացրել էինք, որ այսօր վիրավորվել է Ոստիկանության ՊՊԾ գունդը գրոհած «Սանա ծռեր» զինված խմբի անդամ Արայիկ Խանդոյանը` «Միայնակ գայլը»:
Հիշեցնենք, որ հուլիսի 17-ի առավոտյան «Սասնա ծռեր» զինված խումբը Էրեբունիում գրոհով վերցրել է ՊՊԾ գունդը եւ պատանդ են վերցրել ոստիկանության ծառայողների: Մեկ ոստիկան՝ նույն գնդի փոխհրամանատար Արթուր Վանոյանը զոհվել է: Վիրավորվել են եւս չորս ոստիկաններ եւ ՊՊԾ գնդի գրոհին մասնակցած անձանցից մեկը՝ Թաթուլ Թամրազյանը: Հուլիսի 23-ին «Սասնա ծռերն» ազատ են արձակել վերջին 4 պատանդներին, այդ թվում ՀՀ փոխոստիկանապետ Վարդան Եղիազարյանին եւ եւ Երեւանի փոխոստիկանապետ Վալերի Օսիպյանին:
Ըստ ոստիկանության, հուլիսի 26-ի առավոտյան ոստիկանության եւ զինված խմբի միջեւ փոխհրաձգության ընթացքում վիրավորվել է մեկ ոստիկան եւ «Սասնա ծռերից» Աշոտ Պետրոսյանն ու Հովհաննես Հարությունյանը, նրանք տեղափոխվել են հիվանդանոց:
Հուլիսի 27-ին, ոստիկանության փոխանցմամբ, հրաձգության ընթացքում վիրավորվել են «Սասնա ծռերից» Պավլիկ Մանուկյանը, նրա որդին՝ Արամ Մանուկյանը, ինչպես նաեւ իրավապահները ձերբակալել են զինված խմբից Արամ Հակոբյանին եւ Գագիկ Եղիազարյանին: