Ոստիկանության ՊՊԾ գունդը գրոհած «Սասնա ծռեր» զինված խմբի անդամներն օր առաջ պետք է ազատ արձակեն ՊՊԾ գնդում պահվող բժիշկներին: Այս մասին այսօր՝ հուլիսի 29–ին, լրագրողների հետ հանդիպման ժամանակ նշել է «Ազգային անվտանգություն» կուսակցության նախագահ Գառնիկ Իսագուլյանը: Նրա խոսքով՝ «իրենց մահապարտ եւ հայրենիքի համար կյանք զոհաբերող անձինք թաքնվում են բուժքրոջ հետեւում»:
«Հարկավոր է բաց թողնել ոստիկանության ՊՊԾ գնդում գտնվող բժիշկներին, հարկավոր է զենքը վայր դնել եւ ամեն ինչ բերել օրինական դաշտ: Նորից կոչ եմ անում ներսում գտնվող տղաներին, արդեն ահաբեկիչներին, քանի որ այնտեղ են պահում բժիշկներին, բաց թողեք նրանց: Բոլոր քաղաքական կազմակերպությունները, մարդու իրավունքների տարբեր մասնագիտության տեր մարդիկ, որոնք այս օրերին խոսելով ոստիկանական բռնությունների եւ այլնի մասին, մի խոսք չեն ասում, որպեսզի վայրկան առաջ ազատ արձակեն պատանդ բժիշկներին: Լավ, Վարուժան Ավետիսյանը գնդապետ մարդ է, իրա ասելով պատրաստ է կյանքը տալ հանուն հայրենիքի, էդ բուժքրոջ հետեւում է թաքնվե՞լ հիմա: Այդ տղաները, որոնք իրենց մահապարտ են անվանում, հիմա էդ բուժքրոջ հետեւու՞մ են թաքնվել ու բոլորն ուզում են ասել, որ այս տղաները ապստամբնե՞ր են եւ ուզում են իրենց զոհաբերել ինչ-որ գործընթացների կամ պետության մեջ ինչ-որ լավ գործ անելու համա՞ր»,-ասել է նա: