«Գաղափարակից լիբերալների ալյանս (ԳԱԼԱ)» կուսակցության գրանցումը մերժելու հիմքերը բացառապես պայմանավորված են եղել «Կուսակցությունների մասին» ՀՀ օրենքի մի շարք պահանջները չկատարելու հանգամանքով,այստեղ քաղաքական պատվեր չկա: Այս մասին NEWS.am-ի հետ զրույցում այսօր՝ հուլիսի 29-ին, ասաց ՀՀ ԱՆ տեղեկատվության եւ հասարակայնության հետ կապերի վարչության պետ Լուսինե Մարտիրոսյանը:
«Նախ նշեմ, որ բոլոր այդ խոսակցությունները անհեթեթություններ են, քանի որ ԱՆ իրավաբանական անձանց պետական ռեգիստրի գործակալությունում կուսակցություն գրանցելը ոչ թե քաղաքական, այլ իրավական գործընթաց է: Կուսակցության գրանցումը մերժելու հիմքերը բացառապես պայմանավորված են եղել «Կուսակցությունների մասին» ՀՀ օրենքի մի շարք պահանջները չկատարելու հանգամանքով, որի մասին դիմող կողմը ծանուցվել է: Եվ այն հայտարարությունը, թե իբր միտում կա այս ամենում, իրականության հետ որեւէ աղերս չունեն: Ի դեպ, դիմումատուն տեղեկացվել է, որ մերժման մասին որոշումը ստանալուց հետո կարող են երկու աշխատանքային օրվա ընթացքում շտկել սխալները եւ փաստաթղթերը կրկին ներկայացնել գործակալություն՝ պետական գրանցում կամ պետական հաշվառում կատարելու համար, եւ եթե նախկինում վճարվել էր պետական տուրք, ապա պետական տուրք կրկին չի վճարվի»,-ասաց նա:
Նա նշեց, որ նման դեպքեր եղել են նաեւ գրեթե բոլոր կուսակցությունների գրանցման հետ կապված, նրա խոսքով, սա աշխատանքային կարգով լուծվող հարց է եւ որեւէ բացառիկ խնդիր այստեղ չկա եւ ոչ էլ բացառիկ իրադարձություն է տեղի ունեցել:
Հարցին՝ ԳԱԼԱ-ն հայտարարել է, որ իրենց քաղաքական թիմը պատրաստվում է հայց ներկայացնել ՀՀ արդարադատության նախարարության որոշման դեմ, Լուսինե Մարտիրոսյանը նշեց, որ եթե կուսակցությանը հետաքրքրում է պրոցեսը, այլ ոչ թե արդյունքը, ապա, միանշանակ, իրենք կարող են իրացնել իրենց իրավունքը:
«Նորից եմ ուզում շեշտել, եթե աշխատանքային երկու օրվա ընթացքում ԳԱԼԱ-ն շտկի սխալները եւ փաստաթղթերը կրկին ներկայացնի գործակալություն, ապա առավելագույնը չորեքշաբթի կամ հինգշաբթի նրանց կուսակցությունը գրանցված կլինի»,-ասաց նա:
Ավելի վաղ մամուլում հայտարարություն էր տարածվել, ըստ որի՝ Արդարադատության նախարարությունը մերժել է «Գաղափարակից լիբերալների ալյանս (ԳԱԼԱ)» կուսակցության գրանցումը՝ այն որակելով քաղաքական պատվեր: