Երեւանի Մալաթիա-Սեբաստիա վարչական շրջանների ընդհանուր իրավասության դատարանն այսօր Հիմնադիր Խորհրդարանի անդամ Արմեն Միքայելյանին երկու ամսով կալանավորելու մասին որոշում կայացրեց։ Այս մասին NEWS.am-ին ասաց Միքայելյանի փաստաբան Երվանդ Վարոսյանը:
«Արմենը մեղադրվում է ինքնաշեն ատրճանակ պահելու մեջ, որն իբր «հայտնաբերվել էր» նրա մոտ լույս հուլիսի 27-ի գիշերը։ Ոստիկանական《բարեփոխումները》բացահայտելուց հետո, ականատես ենք լինում Քննչական կոմիտեի ու դատական համակարգի դիմակազերծմանը.»,- ասաց փաստաբանը:
Հիշեցնենք, որ ըստ ոստիկանության հաղորդագրության՝ հուլիսի 27-ին ժամը 3.00-ին Երեւանի Տիգրան Մեծի պողոտայի թիվ 30 հասցեի մոտից ապօրինի կերպով զենք եւ ռազմամթերք պահելու եւ կրելու կասկածանքով Մալաթիայի բաժին բերման են ենթարկել 36-ամյա Արմեն Միքայելյանին, ում մոտից խուզարկությամբ հայտնաբերվել է թմբուկավոր ինքնաշեն ատրճանակ` լիցքավորված 5.6 մմ տրամաչափի 7 փամփուշտով: Նշանակվել է դատաձգաբանական փորձաքննություն: Արմեն Մ.-ն ձերբակալվել է: Կատարվում է քննություն:
«Հիմնադիր խորհրդարանից» էլ կատարվածի վերաբերյալ մասնավորապես հայտնել են. «Արմեն Միքայելյանը ընտանիքով վերադառնում էր տուն Խորենացի փողոցից։ Նրա ճանապարհը փակում են երկու սեւ մեքենաներ, որոնցից դուրս են գալիս մոտ 8-10 քաղաքացիական հագուստով անհայտ անձիք, հարձակվում են Արմենի վրա եւ բռնի ուժ կիրառելով առեւանգում նրան՝ նստացնելով մեքենան եւ տանելով անհայտ ուղղությամբ։
Առավոտյան ժամը 6-ին Արմեն Միքայելյանը զանգահարել է կնոջը եւ տեղեկացրել, որ գտնվում է Ոստիկանության Մալաթիայի բաժանմունքում։ Այնուհետեւ նրան տեղափոխել են Էրեբունու ՁՊՎ։ Կինը հանդիպել է նրան առավոտյան ժամը 11-ի սահմաններում։ Արմենը տեղեկացրել է, որ գիշերը առեւանգելիս նրան ձեռնաշղթաներ են հագցրել եւ գրպանը զենք են գցել՝ հակառակ իր կամքին»։