Սարի թաղում քիչ առաջ բախումներ սկսվեցին։ NEWS.am-ի թղթակիցը հայտնում է, որ ոստիկանները բերման են ենթարկել «Ժառանգություն» կուսակցության փոխնախագահ Արմեն Մարտիրոսյանին, որը նրանց հետ պարզապես բանակցում էր։
Ոստիկանները ծխանռնակներ են նետել ցուցարարների վրա։ Տարածքում նաեւ հրդեհ է բռնկվել, թերեւս այդտեղից անցնող գազատարի վրա։
Ցուցարարները փորձում են կազմակերպված ձեւով նահանջել։ Նախնական տեղեկություններով՝ կան տուժածներ։
Մեր թղթակցի փոխանցմամբ, քաղաքացիական հագուստով ինչ-որ անձինք խոչընդոտում են լրագրողների աշխատանքը, արգելում նրանց տեսագրություններ կատարել։ «Ազատություն» ռադիոկայանը հայտնել է, որ իր նկարահանող խմբի անդամներ Կառլեն Ասլանյանն ու Հովհաննես Մովսիսյանը ծեծի են ենթարկվել քաղաքացիական հագուստով անձանց կողմից։ Այրվածքներ է ստացել նաեւ Ա1+-ի թղթակիցը:
Նշենք, որ իրավիճակի խսիտ թեժ է նաեւ Խորենացի փողոցում, որտեղ մեծ բազմություն է հավաքվել։ Ոստիկանության փոխգնդապետ Այվազյանը դիմելով ցուցարարներին՝ հայտարարել է, թե հավաքն անօրինական է եւ կոչ է արել դադարեցնել այն։ Որոշ ժամանակ անց ոստիկանները հարձակման են են անցել։