Քաղաքացիական հագուստով ոստիկանները փորձել են «Սուրբ Գրիգոր Լուսավորիչ» բժշկական կենտրոնից բերման ենթարկել «Ժառանգություն» կուսակցության Դավիթ Սանասարյանին, որը անգիտակից վիճակում է եղել։
Սանասարյանը հիվանդանոց էր եկել հոր հետ, որը մարմնական վնասվածքներ էր ստացել Սարի թաղում ոստիկանների կողմից խաղաղ երթի մասնակիցներին ցրելու ժամանակ։
Որպես ոստիկան ներկայացած անձինք բռնությամբ, քարշ տալով տարել են Սանասարյանին, իսկ այնտեղ գտնվող քաղաքացիները խափանել են ոստիկանների գործողությունները։ Ի վերջո, բժիշկները Սանասարյանին տեղափոխել են վերակենդանացման բաժանմունք՝ օգնություն ցուցաբերելու համար։ Նշենք, որ նա նաեւ վիրավորվել էր ծխանռնակի բեկորից։
Ինչպես ավելի վաղ հայտնել էր NEWS.am-ը, Երեւանի «Սուրբ Գրիգոր Լուսավորիչ» հիվանդանոցում ժամը 1։30-ի դրությամբ գտնվում է Սարի թաղում տեղի ունեցած բախումների հետեւանքով տուժած 38 քաղաքացի: Նրանցից մեկի վիճակը ծանր է, նա 17 տարեկան երիտասարդ է, որի աչքը վիրահատել են: Մյուսների վիճակը գնահատվում է կայուն:
Հիշեցնենք, որ ոստիկանությունը հուլիսի 29-ին ցուցարարներին ցրելիս հատուկ միջոցներ է կիրառել: Տուժել են նաեւ լրագրողներ։