Երեւանի Խորենացի փողոցից եւ Սարի թաղից հուլիսի 29-ի երեկոյան բերման է ենթարկվել 165 քաղաքացի, որից 26-ը ձերբակալվել է: Այս մասին NEWS.am-ին հայտնեցին ՀՀ ոստիկանության մամուլի ծառայությունից:
Մեր տեղեկություններով, ձերբակալվածների շարքում են նաեւ «Ժառանգության» փոխնախագահ Արմեն Մարտիրոսյանն ու Ադրիաս Ղուկասյանը:
Ավելի վաղ NEWS.am-ը հայտնել էր, որ հուլիսի 29-ի երեկոյան Խորենացի փողոցում եւ Սարի թաղում ոստիկանությունն ուժային գործողությունների է դիմել: ՊՊԾ գնդի առջեւ գտնվող տարածքը (Սարի թաղ) ազատելու մասին նախազգուշացումից հետո ոստիկանությունը հատուկ միջոցներ է կիրառել, հարձակվել մարդկանց վրա։ Պաշտոնական տվյալներով, 60-ից ավելի մարդ մարմնական վնասվածքներ է ստացել եւ տեղափոխվել հիվանդանոցներ: Ակցիայի ընթացքում նաեւ բազմաթիվ լրագրողներ են տուժել: Մասնավորապես, քաղաքացիական հագուստով անձանց կողմից ծեծի են ենթարկվել «Ազատություն» ռադիոկայանի լրագրողներ Կառլեն Ասլանյանը և Հովհաննես Մովսիսյանը, «Արմենիա» հեռուստաընկերության «ԺԱՄԸ» լրատվականի թղթակից Աղվան Ասոյանը և օպերատոր Ալբերտ Գալստյանը, վիրավորվել են «Առաջին լրատվական»-ի լրագրող Մարիամ Գրիգորյանն ու օպերատոր Դավիթ Հարությունյանը, Panorama.am-ի օպերատոր Հովիկ Գրիգորյանը տուժել է պայթուցիկից, այրվածքներ է ստացել «Ա1+»-ի թղթակիցը, տուժել է նաեւ Լրագիր.am-ի օպերատորը։ Ցուցարարներին ցրելիս կոտրել, ապա հափշտակել են NEWS.am-ի թղթակցի տեսախցիկը: Քաղաքացիական հագուստով անձինք, որոնք դուրս են եկել ոստիկանների թիկունքից եւ զինված էին ոստիկանական մահակներով, նաեւ փորձել են ուժ կիրառել NEWS.am-ի թղթակցի նկատմամբ: