2016 թվականի հուլիսի 29-ի լույս 30-ի գիշերը հատուկ միջոցների կիրառմամբ, ծեծով, ֆիզիկական եւ հոգեբանական ճնշումների կիրառմամբ կազմակերպված եւ լայնածավալ բռնություններ իրականացվեցին ՀՀ Ոստիկանության ուժերի կողմից, որի հետեւանքով ֆիզիկական տարբեր աստիճանի վնասվածքներ են ստացել 60-ից ավելի քաղաքացիներ, բերման ենթարկվել՝ 165-ը: Այդ մասին ասվում է Հելսինկյան քաղաքացիական ասամբլեայի Վանաձորի գրասենյակի հայտարարության մեջ:
«2008թ. մարտի 1-ից հետո ոստիկանական բռնությունները աչքի են ընկնում իրենց առանձնահատուկ դաժանությամբ, որոնք թիրախավորված կիրառվեցին Երեւան քաղաքի Սարի թաղի բնակիչների նկատմամբ՝ անկախ տարիքից եւ սեռից: Բռնություններ են կիրառվել նաեւ երեխաների, կանանց նկատմամբ:
Տեղի ունեցածը գնահատում ենք որպես պետական ահաբեկչություն անզեն քաղաքացիների նկատմամբ:
Դատապարտելով ոստիկանական բռնությունները՝ կատարվածի համար անմիջական պատասխանատու ենք համարում անձամբ ՀՀ նախագահ Սերժ Սարգսյանին:
Հայաստանի Հնարապետությունը, որպես Եվրոպայի խորհրդի, ՄԱԿ-ի եւ ԵԱՀԿ անդամ պետություն, չի պահպանել մարդու իրավունքների բնագավառում վերցրած որեւէ պարտավորություն:
Դիմում ենք միջազգային, միջպետական կառույցներին՝ ԵԽ, ՄԱԿ, ԵԱՀԿ, որոնց անդամակցում է Հայաստանի Հանրապետությունը՝ անհապաղ ակտիվացնել իրենց ներկայությունը ՀՀ-ում՝ կանխելու համար իշխանությունների կողմից մարդու իրավունքների շարունակական խախտումները, ապահովելու համար ՀՀ-ում օրենքի գերակայության սկզբունքի իրականացումը, պահանջելու ՀՀ իշխանությունից՝ կատարելու մարդու իրավունքների բնագավառում վերցված միջազգային պարտավորությունները»,- ասվում է հայտարարության մեջ:
